(မိန်းမ - ၁၂)
စုမီအောင်
အစိတ်စိတ်အမြွှာမြွှာ ပြန့်ကြဲပြီး ပြုတ်ကျလာတဲ့အရာတွေကိုကြည့်ပြီး ကျွန်မ အရမ်းဝမ်းနည်းသွားတယ်။ ကျွန်မ ခြေထောက် အောက်မှာ ဟိုတစ်စသည်တစ်စဖြစ်နေတဲ့ အိုးခြမ်းပဲ့အစအနတွေလိုပဲ အဲသည်နေ့က ကျွန်မတို့ရဲ့ဘဝတွေ ဖရိုဖရဲဖြစ်သွားခဲ့တယ်။ ဖေဖေ့ရဲ့တက်ခေါက်သံ အကျယ်ကြီးက ကျွန်မရင်ကို လှိုင်းထစေခဲ့တယ်။ ဖေဖေ့လက်ရာ အိုးတွေကို ဒေါသတကြီးကိုင်ပေါက် ဖျက်ဆီးပစ်နေတဲ့ မေမေ့လုံချည်စကိုဆွဲပြီး 'မလုပ်ပါနဲ့၊ အဲဒါတွေကို မလုပ်ပါနဲ့'လို့ ကျွန်မ အော်ပြောခဲ့ပါသေးတယ်။
'အလကားမိန်းမ၊ အနုပညာကိုတန်ဖိုးထားရကောင်းမှန်းမသိတဲ အရိုင်း အစိုင်းမ'လို့ လက်သီးတွေဆုပ်ပြီးပြောရင်းက ဖေဖေဟာ ကျွန်မကို ရုတ်တရက်ကြီး ပွေ့ချီလိုက်တယ်။ ဒါကိုမြင်တော့ မီးဝင်းဝင်းတောက်နေတဲ့မျက်လုံးတွေနဲ့မေမေဟာ ကျွန်မကို ဖေဖေ့လက်ထဲ ကနေ အတင်းလုချီတယ်။ ပြီးတော့ အာခေါင်ကိုခြစ်ပြီးအော်တယ်။
''ရှင်တစ်ယောက်တည်းထွက်သွား၊ ကျွန်မသမီးကို လမ်းဘေးမှာ အိုးထိုင်လုပ်တဲ့မိန်းမ ဘယ်တော့မှ မဖြစ်စေရဘူး''
ဖေဖေဟာ ကျွန်မကို ဝေသီတဲ့မျက်ဝန်းညိုညိုတွေနဲ့အကြာကြီးပဲ စူးစိုက် ကြည့်နေခဲ့တယ်။ ဖေဖေ့ရဲ့အဲဒီ မျက်လုံးတွေကို ကျွန်မ တစ်သက်မမေ့တော့ဘူး။ ပြီးတော့ ဖေဖေ့ရဲ့နောက်ကျောတစ်စုံ။ ကျွန်မ အကြိမ်ပေါင်းမရေတွက်နိုင်အောင် တက်ဆော့ခဲ့ဖူးတဲ့ ဖေဖေ့ရဲ့ကျောပြင်ကို အဲဒီနေ့က နောက်ဆုံးမြင်တွေ့လိုက်ရခြင်းပါပဲ။
xxxxxxx
ကျွန်မရဲ့ဖေဖေအပါအဝင် ကျွန်မတို့မြို့လေးက လူအတော်များများဟာ အိုးလုပ်တဲ့ပညာနဲ့ အသက်မွေးဝမ်းကျောင်းပြု ကြတယ်။ ဖေဖေအိုးလုပ်ပြီဆို ကျွန်မ မမှိတ်မသုန်နဲ့ အနားကထိုင်ကြည့်ဖြစ်တယ်။ မေမေတစ်စက်ကလေးမှ အထင်မကြီးတဲ့ ဖေဖေ့ လက်ရာ အိုးတွေဟာ ကျွန်မ မျက်စိထဲမှာတော့ အံ့ဖွယ်သူရဲပါပဲ။ တစ်ခါတစ်ခါ ဖေဖေက အိုးလုပ်ရင်း ကျွန်မကို ပုံပြင်ပြောပြတတ်တယ်။ ဖေဖေပြောပြတဲ့ပုံပြင်ထဲကလို အိုးထဲကနေ ဂျင်းနီဆိုတဲ့ မိန်းကလေးထွက်လာလေမလား၊ စွမ်းအားရှင် ဘီလူးကြီးပဲ ထွက်လာလေမလား အထင်နဲ့ ကျွန်မ စောင့်ကြည့်မိတယ်။ နောက်ဆုံးတော့ မီးဝင်းဝင်းတောက်တဲ့ မျက်လုံးတွေနဲ့ မေမေထွက်ထွက်လာတာပဲ ကြုံရ တတ်တယ်။ မေမေက ကျွန်မကို ချိုင်းကနေ မပြီးခေါ်ခေါ်သွားတယ်။ မေမေလစ်တာနဲ့ ကျွန်မက ဖေဖေ့အနား တစ်မုဟုတ်ချင်း ပြန်ရောက်လာတပါပဲ။ ပြီးရင် ရွံ့ဖြူနဲ့ရွံ့ညိုတွေကို သမအောင် 'နှဲ'တဲ့အခါ ဖေဖေ့ကို ကျွန်မ ကူလုပ်ပေးတယ်။ 'နှဲ'တယ်ဆိုတာ ရွံ့တွေကို သမအောင် စေးပိုင်သွား အောင် ခြေထောက်နဲ့လုပ်ရတာပါ။ အဲဒီလို 'နှဲ'ပြီဆိုရင် ကျွန်မသိပ်ပျော်မိတယ်။ ရွံ့တွေပေါ်မှာ စည်းချက်ညီညီနဲ့ ကခုန်နေရသလိုဖြစ်နေလို့ပေါ့။ ဖေဖေက ပန်းပု အနုပညာရှင်ကြီး `မိုက်ကယ်အန်ဂျလို´ ကိုအားကျပုံရတယ်။ သူ့ဆီမှာ "David and the Pieta ဆိုတဲ့ မိုက်ကယ်အန်ဂျလိုအကြောင်းဇာတ်ကားတစ်ကားရှိတယ်။ ဖေဖေဟာ အားတိုင်းအဲဒီအခွေကို ထိုင်ကြည့်နေတတ် တယ်။ ပန်းပုရုပ်တွေကို ကင်မရာမှန်ဘီလူးက တစ်ခုချင်း အနီးကပ်ပြီး ခပ်ဖြည်းဖြည်းရိုက်ပြထားပုံတွေမြင်ရတာ သိပ်အရသာရှိတာပဲ။ ဖေဖေနဲ့အတူ လိုက်ကြည့်ရင်းကနေ ရုပ်ရှင်ကားထဲက ပန်းပုရုပ်ကြီးတွေရဲ့ဖမ်းစားနိုင်မှုက မယုံနိုင်လောက်အောင် ကျွန်မခန္ခာထဲ စီးဝင်ခဲ့တယ်ထင်ပါရဲ့။ ကျွန်မဟာ ဖေဖေ့ကို မိုက်ကယ်အိန်ဂျလို လိုမျိုး ကမ္ဘာကျော်ပညာရှင်ကြီးဖြစ်စေချင်သလို ကျွန်မကိုယ် ကျွန်မ လည်း ကမ္ဘာကျော်အဖြစ် စိတ်ကူးတွေခမ်းနားနေခဲ့တယ်။
အခုတော့ အနားမှာ ဖေဖေလည်းမရှိတော့ဘူး။ ကျွန်မရဲ့စိတ်ကူးတွေလည်း မေမေရိုက်ခွဲဖျက်ဆီးပစ်ခဲ့တဲ့ ဖေဖေ့လက်ရာ အပိုင်းအစတွေလို တစ်စစီပြိုကွဲပျက်စီး သွားခဲ့ပြီလားလို့ စဉ်းစားမိတိုင်း ကျွန်မသွေးပျက်မိတယ်။ စိတ်တွေချောက်ချားမိပေမဲ့ လက်တွေ ကတော့ စွန့်စားချင်တုန်းပါပဲ။ မေမေ့မျက်ကွယ်မှာ ကျွန်မဟာ ဖေဖေ့မိတ်ဆွေ အိုးလုပ်တဲ့လူတွေဆီသွားပြီး သူတို့စွန့်ပစ်ထားတဲ့ အပိုပစ္စည်းတွေနဲ့ အရုပ်အမျိုးမျိုး လုပ်တယ်။ ပြေးနေတဲ့ မြင်းရုပ်၊ တွားသွားနေဟန် မိကျောင်းရုပ်၊ ရေကူးနေဟန် ငါးရုပ်၊ ပျံနေတဲ့လိပ်ပြာ အစရှိသဖြင့်ပေါ့။ ကျွန်မရဲ့လက်ရာတွေကို အားလုံးက ဝိုင်းပြီး ချီးကျူးကြတယ်။
'' မင်းဟာ အရွယ်နဲ့မလိုက်အောင် ပါရမီရှိတဲ့မိန်းကလေးပဲ''
''သိပ်တော်တာပဲ တကယ့်အဖေတူသမီး''
''ညည်းအဖေကို တွေ့စေချင်စမ်းပါဘိ''
အဲဒီလိုတစ်ယောက်တစ်ပေါက်ပြောပြီး ကျွန်မ စိတ်ရှိလက်ရှိလုပ်စေဖို့ လုံလောက်တဲ့အပိုပစ္စည်းတွေစုဆောင်းပေးကြတယ်။ သူတို့ဟာ သိပ်ကောင်းတဲ့ အိမ်နီးချင်းတွေပါ။ သူတို့ပြောသလိုပဲ ကျွန်မ လုပ်ပြီးသမျှလက်ရာတွေအပေါ် ကျွန်မ အမြဲတမ်းကျေနပ် နှစ်သိမ့်မှုရတာချည်းပါပဲ။ တစ်ခုတော့ရှိတယ်။ တိရစ္ဆန်တွေပုံကို လုပ်ရာမှာ ကျွမ်းကျင်သလောက် လူတစ်ယောက်ရဲ့ ပုံကိုလုပ်ပြီ ဆိုရင်တော့ ကျွန်မ ကိုယ်ကျွန်မ အားမလိုအားမရ ဖြစ်မိရတာချည်းပါပဲ။ အထူးသဖြင့် မလှမ်းချင်လှမ်းချင် ခြေလှမ်းတွေနဲ့ ကျောခိုင်း ထွက်ခွာသွားရတဲ့လူတစ်ယောက်ရဲ့ပုံပေါ့။ အဲဒီလို လူရုပ်ပုံ လုပ်မိတိုင်း မျက်ဝန်းတစ်စုံနဲ့နောက်ကျောတစ်စုံကိုမြင်ယောင်ပြီး ကျွန်မ မျက်ရည် ဝိုင်းရတယ်။ မျက်လုံးအိမ်တစ်ခုလုံးပြည့်လျှံ ဝေ့တက်လာတတ်တဲ့ မျက်ရည်တွေကြောင့် မြင်ကွင်းဟာဝေဝါးသွားလေ့ရှိတယ်။ ရွံ့စေးတွေပေကျံနေတဲ့ ကျွန်မရဲ့လက်အစုံဟာလည်း တဆတ်ဆတ်တုန်ခါနေတတ်တယ်။ ဒါနဲ့ပဲ လူပုံသဏ္ဌာန်တစ်ခုဟာ ဘယ်တော့မှ ရုပ်လုံးပေါ်မလာတော့ဘဲ အားလုံးပြိုပျက်သွားရတာချည်းပါပဲ။ တစ်ခါတစ်ခါ ဇွဲခတ်ပြီး ကြိုးစားလုပ်နိုင်ပေမဲ့ အဲဒါဟာ ကျွန်မစိတ်ကူးထဲက လူရုပ်နဲ့ လားလားမှမတူဘူးလို့ ခံစားသိရှိလိုက်ရတဲ့အခါမှာတော့ ကျွန်မကိုယ်တိုင်ပဲ အဲဒီလက်ရာကို ချက်ချင်း ကိုင်ပေါက်ပြီး ခြေမွပစ် လိုက်မိတာချည်းပါပဲ။ ကျွန်မစိတ်ကျေနပ်မှုရတဲ့အထိ တစ်နေ့မှာ လုပ်နိုင်လိမ့်မယ်လို့တော့ တိတ်တခိုးမျှော်လင့်ထားပါတယ်။ ဒါကြောင့်လည်း ကျွန်မအာရုံထဲမှာ အမြဲကြီးစိုးနေတတ်တဲ့ လူတစ်ဦးရဲ့ရုပ်ပုံကို အခွင့်အရေးရရင်ရသလို ကျွန်မပုံဖော် လုပ်ကြည့်နေမိခဲ့ တယ်။ ဒါပေမဲ့ အဲဒီလူရုပ်ကို လုပ်ဖို့စတင်လိုက်တာနဲ့တစ်ပြိုင်နက် ကျွန်မမျက်လုံးအိမ်အတွင်းသားထဲကနေ ခံရခက်တဲ့ စူးအောင့်အောင့် ဝေဒနာနဲ့အတူ မျက်ရည်ပူတွေပြည့်လျှံမို့မောက်လာပြီး လက်ရှိမြင်ကွင်းတစ်ခုလုံးဟာ ဘာမှမသဲကွဲတော့ဘဲ ဝေဝါးသွားကြတယ်။ ဒီလိုနဲ့တစ်နေ့မှာ ကျွန်မ ဘဝကံဆိုး မိုးမှောင်ကျတဲ့နေ့ကြုံလိုက်ရတယ်။
xxxxxx
အဲဒီနေ့နံနက်က အဖေ့ကိုအိပ်မက်မက်ရင်း ကျွန်မနိုးထလာခဲ့တယ်။ ပြတင်းပေါက်မြင်ကွင်းတွေဟာ ခါတိုင်းလိုကြည်လင် မနေကြဘူး။ မျက်စိထဲမှာ အရာရာဟာ မှိုင်းအုံ့အုံ့နဲ့ တစ်မျိုးကြီးပဲလို့တော့ ခံစားနေရတယ်။အမေ့အလစ်မှာ ထုံးစံအတိုင်း အိမ်နီးချင်းတွေ ဆီကို လှစ်ခနဲထွက် လာခဲ့လိုက်တယ်။ အိပ်မက်ထဲမှာ အသေအချာကြီး မြင်တွေ့ခဲ့ရတဲ့ အဖေ့ရုပ်ပုံကို ဒီနေ့လုပ်မယ်ဆိုတဲ့ အတွေးတွေနဲ့ ကျွန်မခြေလှမ်းတွေ တက်ကြွ နေခဲ့တယ်။ အဖေ့ကို ထူးထူးကဲကဲသတိရနေတာကြောင့် ဒီနေ့ ကျွန်မရဲ့ အလုပ်ဟာ သေချာပေါက် အောင်မြင်လိမ့်မယ်လို့လည်း တွက်ဆထားလိုက်တယ်။
''ဧလိယ ပါလား၊ ညည်းမှာ သတ္တဝါတွေလည်းစုံသလောက်ရှိနေပြီ၊ ဆိုစမ်းပါဦး ဒီနေ့မှာ ဘာအရုပ်လုပ်မယ် စိတ်ကူးလဲ''
''ဒီနေ့မနက် အိပ်မက်ထဲမှာ မြင်ခဲ့ရတဲ့အရာပေါ့''
အိမ်နီးချင်း အဘိုးအိုက ကျွန်မကို ရှုံ့တွတွဝေသီသီမျက်လုံးတွေနဲ့ တအံ့တသြပင့်ကြည့်ရင်း မေးတယ်။
''ဘာများပါလိမ့် သူငယ်မရယ်''
''အို အဘိုးကလဲ ပြီးတော့ တွေ့လိမ့်မပေါ့၊ ခုတော့ ကျွန်မ မပြောလိုသေးဘူး''
''ညည်းသဘောပါပဲ သူငယ်မရေ'' လို့ အဘိုးအိုကပြောပြီး သူနှဲထားပြီးသား ရွှံ့စေးတွေကို ကျွန်မစိတ်ကြိုက်အသုံးပြုခွင့် ပေးတယ်။ လိုသလောက် ရွှံ့စေးတွေကို ကျွန်မ ကောက်ယူလိုက်စဉ်မှာပဲ မျက်လုံးအိမ်ရဲ့အတွင်းသားနက်နက် တစ်နေရကနေ မခံမရပ် နိုင်လောက်တဲ့စူးအောင့်အောင့် ဝေဒနာတစ်ခုကို ရုတ်တရက်ခံစားလိုက်ရတယ်။ ကျွန်မငုံ့ကြည့်နေတဲ့ ရွံ့တွေဟာ ညစ်ထေးမှိုင်းပုပ်သွား ကြတယ်။ ဒါ ဘယ်လို ဖြစ်ရတာပါလိမ့်...။ခါတိုင်းလို မျက်ရည်တွေဝေ့လျှံလာလို့ပဲလားဆိုတဲ့အတွေးနဲ့ မျက်တောင်တွေကို ပုတ်ခတ် ပုတ်ခတ် လုပ်လိုက်တယ်။ အဲဒီမှာ ရွှံ့တွေကို ကျွန်မ မမြင်ရတော့ဘူး။ ငုံ့ကြည့်နေတဲ့ကြားက ကျွန်မရဲ့လက်တွေကိုလည်း ကျွန်မ မမြင်ရတော့ဘူး။ တစ်ခုခုတော့မှားနေပြီ။ ရွှံ့တွေဘယ်ရောက်သွားလဲ။ ပြီးတော့ ကျွန်မရဲ့လက်တွေရော ဘယ်ရောက်သွားကြလဲ။ ဘယ်လိုပဲ ငုံ့ကြည့်ကြည့် ကျွန်မကိုယ် ကျွန်မတောင်မှ ရှာမတွေ့နိုင်တော့ဘဲ ကျွန်မဟာ ကျွန်မမျက်စိအောက်မှာပဲ ထူးထူး ဆန်းဆန်း ကြီးကို ပျောက်ဆုံးနေပါတယ်။ လက်တွေကိုဆန့်တန်း၊ ဖြည်းဖြည်းချင်းထရပ်ပြီး ဝန်းကျင်ကိုဖြန့်ကျက်ကြည့်မိတော့ ရှစ်ခွင်တစ်ခွင်လုံး ဟာ မှိုင်းမှိုင်းထလို့။ အရာရာနဲ့ ကျွန်မနဲ့အကြားမှာ တစ်စုံတစ်ရာက ပိတ်ဆို့ပြီး ကြားဝင်ကာဆီးလိုက်သလို ကျွန်မဟာ ရှိရှိသမျှ အရာခပ်သိမ်းနဲ့ အဆက်ပြတ်သွားတယ်။
ပထမဆုံး ကျွန်မ တုန်လှုပ်ချောက်ချားသွားတယ်။ ပြီးတော့ အာခေါင်တွေ ခြောက်ကပ်စေးထန်းလာပြီး ရေငတ်လာတယ်။ ဘာမှန်းမသိတဲ့ ဒီအနေအထားကြီးကို မနှစ်မြို့နိုင်တော့တဲ့အဆုံးမှာ ကျွန်မ ငိုကြွေးမေ့မြောပစ်ချင်မိတယ်။ ဒါပေမဲ့ ကျွန်မ သတိလစ် မေ့မြောသွားလို့မဖြစ်သေးဘူး။ အဖေ့ရဲ့ပုံတူကို ကျွန်မ အကောင်အထည် ဖော်ရဦးမယ်မဟုတ်လား။ ဘာဆိုဘာမှ မမြင်နိုင်တဲ့ကြားကနေ အာရုံတွေကို ရုန်းကန်စုစည်းလိုက်တဲ့အခါ အမှောင်ထုနက်နက်ထဲမှာ တလက်လက်တောက်နေတဲ့ မျက်ဝန်းတစ်စုံကို ကျွန်မ မြင်မိ တယ်။ ဘဝတစ်သက်စာ စွဲငြိနေတော့မယ့် မျက်ဝန်းတွေပါ။ ဒါဟာ အဖေ့ရဲ့မျက်လုံးတွေပဲလို့ ကျွန်မသိလိုက်ရတော့ အားတက်လာ တယ်။ ပြီးတော့ မျက်ဝန်းရဲ့ထောင့်တစ်နေရာမှာ ရှည်မျောမျောခိုတွဲနေတဲ့ မျက်ရည်တစ်စကို ကျွန်မ လက်တွေနဲ့ နူးညံ့ညင်သာစွာပဲ ထိတွေ့ခွင့်ရလိုက်တယ်။ မျက်ဝန်းတစ်စုံနဲ့ ဒီအထိအတွေ့ တစ်ခုကလွဲလို့ ကျွန်မ ဘာဆိုဘာမှ မသိတော့ဘူး။
ကျွန်မ အသိဝင်လာတဲ့အချိန်မှာ အနားမှာရှိနေတဲ့၊ အိုမဟုတ်ဘူး ရှိတယ်လို့ ထင်ရတဲ့လူတွေကို ကျွန်မ တတွတ်တွတ်နဲ့ မေးမိတယ်။
''ကျွန်မ ဘာဖြစ်သွားတာလဲ...ကျွန်မ ဘာဖြစ်သွားတာလဲ..သိတဲ့လူရှိရင် ပြောပြစမ်းပါရှင်''
xxxxxxx
မျက်လုံးတွေစပ်ဖျင်း နာကျင်လွန်းနေတာကြောင့် ကျွန်မရဲ့မျက်လုံးထဲက ထွက်ကျလာတဲ့အရည်တွေဟာ ရိုးရိုးမျက်ရည်တွေမှ ဟုတ်ရဲ့လား အဲဒါ ချော်ရည်ပူတွေလား၊ သွေးရည်ပူတွေများလား၊ အက်ဆစ်ရည်တွေလား..လို့ ထင်မှတ်မိတဲ့အထိပါပဲ။ သူတို့က ကျွန်မဟာ မျက်မမြင် တစ်ယောက်ဖြစ် သွားနိုင်တယ်၊ ကံကောင်းရင် ခွဲစိတ်ကုသမှုလုပ်အပြီးမှာ ပြန်မြင် ရနိုင်တယ်လို့ ကြိုတင်ရှင်းပြကြ တယ်။ ဒါပေမဲ့ ကျွန်မရဲ့မျက်လုံးတွေ လုံးလုံး ကွယ်သွားခဲ့ပါပြီ။ ဆိုးတာက အမေဟာ ကျွန်မဆေးရုံပေါ်မှာရှိနေစဉ်တစ်လျှောက်လုံး ကျွန်မဆီ တစ်ကြိမ်မှ ရောက်မလာခဲ့ဘူး။ ကျွန်မဟာ ဆေးရုံခုတင်ပေါ်မှာ တစ်ကိုယ်တည်း ထိုင်လျက်ဖြစ်စေ၊ အိပ်လျက်ဖြစ်စေ စက္ကူကြိုးကြာရုပ်လေးတွေလုပ်ရင်း အမေ့ကို မျှော်မျှော်နေမိတယ်။ ညသန်းခေါင်ကြီးနိုးလည်း ကျွန်မ မပျင်းတော့ဘူး၊ လက်တွေ ညောင်းညာကိုက်ခဲတဲ့အထိ စက္ကူခေါက်တယ်။ ကြိုးကြာရုပ်လေးတွေ တစ်ထောင်ပြည့်ရင် ဆုတောင်းတာတွေပြည့်တတ်တယ်လို့ ကျွန်မ သိထားတယ်လေ။
တစ်နေ့မှာတော့ ကြိုးကြာရုပ်လေးတွေလည်း တစ်ထောင်ပြည့်ခဲ့ပါပြီ။ ဒါပေမဲ့ ကျွန်မ ဆုတောင်းတွေကတော့ တစ်ခုမှမပြည့်ခဲ့ ပါဘူး။ ဆေးရုံကဆင်းအပြီးမှာ အမေရှိရာကို ကျွန်မ လိုက်သွားတယ်။ အမေ ဘာ့ကြောင့်ကျွန်မဆီ ရောက်မလာသလဲ ဆိုတာကို ခုတော့ ကျွန်မသိရပါပြီ။
အမေ့ရဲ့မြေပုံလေးထက်မှာ မျက်ရည်နဲ့လုပ်တဲ့ ကြိုးကြာရုပ်လေးတွေဖြန့်ကြဲပြီး ဦးခိုက်ကန်တော့လိုက်တယ်။ အဲဒီမှာ ဘာမှ မမြင်တဲ့ကြားက မြင်နေရတာတစ်ခုရှိတယ်လို့ ကျွန်မ သိရပြန်တယ်။ မျက်လုံးတစ်စုံပါပဲ။ ကရုဏာနဲ့စိုက်ကြည့်နေတဲ့ အဖေ့ရဲ့ ဝေသီသီ မျက်လုံးတစ်စုံ။ မျက်အိမ်ထောင့်စွန်းမှာ မျက်ရည်ဥတစ်စက် ခိုတွဲနေတဲ့ မျက်လုံးတစ်စုံ။
xxxxxx
တွယ်ရာမဲ့ကျွန်မကို မြို့ကလေးကလူတွေက အကောင်းဆုံး မျက်မမြင် ကျောင်းရှိရာ မြို့တော်ဆီပို့ပေးကြတယ်။ အဲဒီ မျက် မမြင်ကျောင်းဟာ အခြားမျက်မမြင် တွေအတွက် အကောင်းဆုံးဖြစ်ပေမဲ့ ကျွန်မအတွက်တော့ သိပ်ပြီးပညာမရတဲ့ ခပ်ညံ့ညံ့ကျောင်းပါ။ အဲဒီမှာ ဇာထိုးပန်းထိုး၊ သိုးမွေးချည်ထိုး၊ လက်ချုပ်စက်ချုပ်၊ ကြိမ်ရက် စတဲ့ လက်မှုပညာမျိုးစုံကိုသင်ပေးပေမဲ့ ကျွန်မ စိတ်မဝင်စားဘူး။ ကျွန်မကို တာဝန်ယူပြီး သင်ပေးတဲ့ဆရာမတွေကလည်း ကျွန်မကိုစိတ်ပျက်တယ်တဲ့။ ဘာမှ အဖြစ်မရှိတဲ့မိန်းကလေးလို့ တီးတိုးတီးတိုး ပြောကြတယ်။ အမှန်က နည်းစနစ်ကြီး တစ်ခုကို လက်ထဲထည့်ကိုင်ထားပြီး စက်ရုပ်တွေလို လှုပ်ရှားနေတဲ့ သူတို့ကို ကျွန်မ စိတ်ပျက် နေမိတာ။ ကျွန်မ ဘာကို သင်ယူချင်တယ်ဆိုတာ သူတို့မသိကြဘူး။ နည်းပြ ဆရာတွေဟာ ကျွန်မကိုခေါ်ပြီး ခေါင်းချင်းဆိုင် ဆွေးနွေးကြ တယ်။
''ခက်တယ်ဗျာ၊ ဒီကိုရောက်ရင် ဒါတွေလုပ်ရမှာပဲ၊ အားလုံးလည်း ဒီလိုလုပ်ကြတာပဲ၊ သူ့ကျမှ...''
''ဒီပုံစံနဲ့တော့ သူ့ဘဝရှေ့ရေး ရင်လေးပါသေးတယ်''
နည်းနည်းသိမ်မွေ့ပုံရတဲ့ ဆရာမတစ်ယောက်က ကျွန်မလက်ထဲကို ကြိုးတစ်ချောင်းလာထည့်ပြီး 'ဖွတ်မြီးထိုးတာ ဒီလို...'ဆိုပြီး လာလုပ်ပြတယ်။ သူ့လက်တွေထဲကနေရုန်းထွက်ပြီး ကျွန်မ လက်ပိုက် မတ်တတ်ရပ်လိုက်တယ်။ ပြီးတော့ ပြတ်ပြတ်သားသား ပြောပစ်လိုက်တယ်။ကျွန်မကို ကျောင်းထုတ်ချင်လည်း ထုတ်ပလေ့စေ ဆိုပြီးတော့ပေါ့။
''မလုပ်ဘူး...ဒါတွေ ကျွန်မ မလုပ်ချင်ဘူး''
''မလုပ်ချင်ဘူး ဟုတ်လား..ဒါဖြင့် မင်းလုပ်ချင်တာက ဘာလဲ''
ခုမှပဲ ဒီမေးခွန်းကိုမေးဖော်ရတော့တယ်။ ကျွန်မ ခေါင်းမော့ပြီး ဖြေလိုက်တယ်။
''မိုက်ကယ်အန်ဂျလို လိုမျိုး ရုပ်တုတွေလုပ်ချင်တာ''
အမှန်က 'အဖေ့လို အရုပ်တွေလုပ်ချင်တာ' လို့ ကျွန်မ ပြောလိုက်ချင်တာပါ။ ကျွန်မပါးစပ်ထဲကနေ ကမ္ဘာကျော် အနုပညာရှင် ကြီးတစ်ဦးရဲ့နာမည် ဘုတ်ခနဲ ထွက်ကျ လာတဲ့အတွက် သူတို့အံ့အားသင့်ပြီး ဆွံ့အသွားကြပုံပါပဲ။ တစ်ခန်းလုံး အပ်ကျသံတောင်မှ ကြားရလောက်တဲ့အထိ ငြိမ်ဆိတ်သွားကြတယ်။ သူတို့စိတ်ထဲမှာတော့ မတန်မရာမှန်းတဲ့ မိန်းကလေး၊ လေလုံးကြီးထွားတဲ့ မိန်းကလေး ဆိုပြီး ကျွန်မကို ရယ်ချင်ပက်ကျိဖြစ်နေမှာပဲ။ ဘာမှတော့ နောက်ထပ်ပြောသံမကြားဘူး။
နောက်တစ်နေ့မှာတော့ အကြီးဆုံးဖြစ်ပုံရတဲ့နည်းပြက ကျွန်မကို သီးသန့် ခေါ်ထုတ်သွားတယ်။ ကျွန်မကို ဇာတိမြေပြန်ပို့လိမ့် မယ်လို့ ကျွန်မ ထင်နေမိတယ်။
'ပို့လေ ပို့ပေါ့၊ ဘာဖြစ်လဲ..ဒါလည်း ကောင်းတာပါပဲလေ'လို့ ကျွန်မ တွေးနေမိတယ်။
ဒါပေမဲ့ ကျွန်မတွေးသလို ဖြစ်မလာခဲ့ပါဘူး။
''ဟောဒီမှာ သစ်သားတစ်တုံး၊ ဒါက စူးတွေ ဆောက်တွေ၊ ကိုင်း မင်း လုပ်ချင်တာ လုပ်ပေတော့''
မထင်မှတ်တဲ့အရာတွေ လက်ထဲရောက်လာတဲ့အတွက် ကျွန်မ အရမ်းကို ပျော်ရွှင်သွားတယ်။
''ကျေးဇူးတင်ပါတယ်''လို့ သူ့ကိုမှန်းမော့ကြည့်ပြီး ပြောတော့ သူက ကျွန်မ ပခုံးတွေကို ကျစ်ကျစ်ပါအောင်ဆုပ်ကိုင်လာတယ်။
''ကမ္ဘာကျော် ပန်းပုဆရာမကြီးဖြစ်တဲ့အခါ မင်း ငါ့ကိုမေ့သွားမယ်မထင်ဘူး၊ ဟုတ်တယ် မဟုတ်လား''
ကျွန်မ စကားတောင်ပြန်မပြောနိုင်တော့ဘဲ တုန်တုန်ခိုက်ခိုက်ဖြစ်လာပြီး ခေါင်းကိုသာ တဆတ်ဆတ်ညိတ်ပြလိုက်တယ်။ ကျွန်မခေါင်းညိတ်ပြတာ သူ ကောင်းကောင်း တွေ့မှာပါ။ အဲဒီအချိန်ကစပြီး ကျွန်မရဲ့လက်တွေ တစ်စက်ကလေးမှ အငြိမ်မနေကြ တော့ဘူး။ နှစ်ဆယ့်ရှစ်ရက်အကြာမှာတော့ ကျွန်မလက်တွေ ရပ်နားတယ်။ လက်ထဲကအလုပ်ကို လက်စသတ်လိုက်တယ်။ နည်းပြကြီးနဲ့ တကွ မြင်သမျှဆရာတွေက ကျွန်မလုပ်တဲ့အရုပ်ကိုကြည့်ပြီး 'သိပ်တော်တာပဲ၊ သိပ်တော်တာပဲ' တဖွဖွလို့ ချီးမွမ်းကြတယ်။ ကျွန်မနဲ့ဘဝတူမိတ်ဆွေတွေကတော့ 'အဲဒါဘာပုံလဲ' လို့ ဝိုင်းမေးကြတာပေါ့။ တကယ်တော့ကျွန်မက ကိုယ်ဝန်ဆောင် မိခင်တစ်ယောက် ရဲ့ပုံကို မှန်းဆလုပ်ခဲ့တာပါ။ အသေအချာပြောရရင် အမေ့ပုံပေါ့။ ခပ်ဖောင်းဖောင်းစူထွက်နေတဲ့ ဗိုက်ထဲမှာတော့ ကျွန်မက ကွေးကွေး လေး ဇောက်တိဇောက်ထိုးလေး ရှိနေမှာပေါ့။ ကျွန်မက ဘာမှမဖြေလေတော့ သူတို့အားလုံး ကျွန်မရဲ့သစ်သားပန်းပုရုပ်အပေါ် တစ်ယောက်တစ်ပေါက် ထင်မြင်ချက်ပေးကြတယ်။သူတို့လက်တွေကတော့ အရုပ်ကို စမ်းတဝါးဝါးကိုင်ကြည့်နေကြမှာပေါ့။
''ဒါက ဦးခေါင်း''
''ဒါက လက်တွေထင်တယ်''
''ဒီမှာ နှာခေါင်း''
နောက်ဆုံးတော့ ဒါဟာ လူတစ်ယောက်ရဲ့ပုံဆိုတာ သူတို့စမ်းမိသွားကြတယ်နဲ့ တူပါရဲ့….။
''ဟေး'' လို့ထအော် လက်ခုပ်တီးကြတာ ကျွန်မတောင် လန့်သွားမိတယ်။ လက်တွေဆီက အထိအတွ့အရ လူပုံမှန်းသိနိုင်ကြ ပေမဲ့ ဒါဟာ မိန်းမတစ်ယောက်လား ယောက်ျားတစ်ယောက်လား ဆိုတာတော့ သူတို့မသိကြဘူး။ ဘာပဲဖြစ်ဖြစ် အဲဒီ နေ့ဟာ ကျွန်မရဲ့ ရှင်သန်ခြင်းနေ့ လေးတစ်နေ့ပါပဲ။ နောက်တော့ နည်းပြကြီးက ကျွန်မကို အဆင့်မြင့်ပန်းချီပန်းပု သင်တန်းကျောင်း တစ်ခုကို လွှဲပြောင်း ပို့ပေးတယ်။ အဲဒီကျောင်းမှာက မျက်မမြင်ဆိုလို့ ကျွန်မ တစ်ယောက်ပဲရှိပါတယ်။ အဲဒီမှာ သင်တန်းသားတစ်ယောက်ဖြစ်တဲ့ 'ရှံဆုန်'က ကျွန်မကို အမြဲအကူအညီပေးပါတယ်။ သူက ပန်းပုထက် ပန်းချီကို ပိုအားသန်သူ ဖြစ်တယ်လုိ့ ကျွန်မ သိခွင့်ရခဲ့တယ်။
xxxxxx
ရင်းနှီးလာတဲ့တစ်နေ့မှာ သူရဲ့ Gateway of Art ဆိုတဲ့ ကိုယ်ပိုင်စတူဒီယိုကို ကျွန်မ ရောက်ဖူးခဲ့ပါပြီ။ သူရေးဆွဲထားတဲ့ ပန်းချီ ကားတွေကို ကျွန်မ မမြင်နိုင်တဲ့အတွက် ဝမ်းနည်းပြီး ငေးငိုင်နေမိရင် ရှံဆုန်က ချက်ချင်းပဲ ကျွန်မ စိတ်ပျော်အောင်လုပ်ပေးတတ်တယ်။ ကျွန်မလက်ကိုကိုင်ပြီး သူ့ပန်းချီကားတစ်ခုချင်းနဲ့ ထိတွေ့မိတ်ဆက်ပေးတယ်။ ဒါဟာ ဘယ်လိုကားမျိုးဖြစ်တယ်၊ ဘာပေါ်မှာ ဘာမီဒီယမ် နဲ့ ရေးထားတယ်လို့ ပြောပြတတ်ပေမဲ့ ဘယ်လိုအရောင်တွေ ရေးခြယ်ထားတယ်ဆိုတာကိုတော့ ဘယ်တော့မှမပြောပြဘဲ သူက ပဟေဠိ ဝှက်လေ့ရှိတယ်။
သူက ကျွန်မလက်ကိုဆွဲယူတယ်။ ပြီးတော့ ကားချပ်တစ်နေရာမှာ ငြိမ်ငြိမ်လေး ထိတွေ့ခိုင်းထားပြီး ခပ်ဖြည်းဖြည်းလေး မေးခွန်းတွေ ထုတ်တော့တာပဲ။
''ဒီနေရာမှာ ဘာရောင်သုံးထားလဲ''
''ဒီနားမှာ ဘာအရောင်ရှိမယ်လို့ ထင်လဲ''
ဘာရမလဲ။ ကျွန်မလည်း စဉ်းစားဟန်ပြုပြီး ပါးစပ်ထဲတွေ့ကရာ အရောင်တွေ လျှောက်ပြောပစ်လိုကတာပေါ့။
''ဘဲဥပုပ်ရောင်''
''မြင်းချေးရောင်''
ကျွန်မ ပေါက်တတ်ကရတွေ ဘာအရောင်လို့ပြောပြော၊ သူက တဟားဟားနဲ့ အသံထွက်အောင်ရယ်ပြီး သဘောကျနေတာ ချည်းပဲ။
'သိပ်မှန်တာပဲ' 'တကယ်' 'ဟုတ်တယ်' 'ဘယ်လိုသိတာလဲ' 'တော်လိုက်တဲ့မိန်းကလေး' ဆိုပြီး ကျွန်မကို အမှတ်ပြည့် ပေးလေ့ရှိတယ်။ ကျွန်မဘေးနားမှာ ရှံဆုန်ရှိတာဟာ ကမ္ဘာကြီးတစ်ခုလုံးကို ဖြန့်ကျက်သိခွင့်ရလိုက်သလိုပါပဲ။
သည်လိုနဲ့ သူဟာ ကျွန်မဘဝမှာ အရေးပါတဲ့လူဖြစ်မှန်းမသိ ဖြစ်ခဲ့ပါပြီ။ တဖြည်းဖြည်းနဲ့ သူ့ရဲ့စတူဒီယိုသာမက သူ့အိမ်၊ သူ့ခြံ တစ်ခုလုံးဟာ ကျွန်မရဲ့ပန်းပုပစ္စည်းတွေနဲ့ ပြည့်နှက်နေပါပြီ။ ရှံဆုန်က ကျွန်မအတွက် သစ်သားတွေ၊ ဖယောင်းတုံး တွေသာမက တန်ဖိုးကြီးတဲ့ ကျောက်သားတွေအထိ ရှာဖွေစုဆောင်းပေးပါတယ်။ ဖယောင်းနဲ့လုပ်ရတာက ပြုပြင်လို့လွယ်ကူပေမဲ့ ကျွန်မတော့ သိပ်မကြိုက်မိဘူး။ ကျောက်သားနဲ့လုပ်ရတာကို ကျွန်မအရသာပိုတွေ့မိတယ်။ ဆောက်နဲ့၊ တူနဲ့ တစ်ချက်ထုနှက်လိုက်၊ လက်နဲ့ပြန်စမ်း ကြည့်လိုက်၊ ပြီးတော့ ဆောက်ကို ပြန်နေရာချပြီး ထပ်ထုလိုက်နဲ့ အတော့်ကို သတိထားပြီး စိတ်ရှည်လက်ရှည်လုပ်ရတာမျိုးဆိုတော့ ကျွန်မရဲ့စိတ်အာရုံတွေကိုလည်း ပိုပြီး တည်ငြိမ်စေပါတယ်။
ပြီးတော့ ဒါက ဖဲ့ပြီး ထုပြီးရင် ပြန်ပြင်လို့မရတဲ့အတွက် ဘယ်လောက်ဖဲ့ပစ်မယ်၊ ဘယ်လောက်ထုပစ်မယ် ဆိုတာကို မလုပ်ခင် ကတည်းက အတိအကျစဉ်းစားထားရတာမို့ ကျွန်မရဲ့အတွေးအမြင်၊ အယူအဆ စဉ်းစားဥာဏ်တွေကိုလည်း ပိုပြီးရင့်သန်စေတယ်လို့ ကျွန်မတော့ ထင်မိတာပဲ။ အရင်ကဆိုရင် ကျွန်မအရုပ်တွေနဲ့ပတ်သက်ပြီး လူတွေရဲ့အမြင်ကို အလေးထားမေးလေ့ရှိတယ်။ တချို့က 'နှာခေါင်းသိပ်ကြီးနေတယ်' ပြောပြီး တချို့ကျပြန်တော့ ဒီတစ်ရုပ်တည်းကိုပဲ 'နှာခေါင်းက သေးလွန်းနေတယ်' လို့ ပြောပြန်ပါလေရော။ မျက်စိမြင်တဲ့လူတွေဖြစ်ပြီး တစ်ယောက်တစ်မျိုးစီ အမျိုးမျိုးပြောနေကြတော့ ကျွန်မ ဘာကို အမှန်ယူရကောင်းမှန်းမသိတော့ဘဲ တွေဝေ အားငယ်မိတယ်။ ဒါကို ရှံဆုန်က သိပ်တော့ မကြိုက်ချင်ဘူး။
''ကိုယ့်လက်နဲ့ကိုယ် စမ်းကြည့်ပြီး ကောင်းတယ်ထင်ရင် ကောင်းတယ်လို့မှတ်၊ မကောင်းဘူးထင်ရင် မကောင်းဘူး သတ်မှတ် လိုက်ရုံပဲ၊ သူများတွေရဲ့အမြင်ကို အားကိုးပြီး ဂရုစိုက်လွန်းနေရင်တော့ ဘာတစ်ခုမှ ဆက်လုပ်ဖြစ်မှာမဟုတ်ဘူး...။ အနုပညာဆိုတာ သူကိုယ်တိုင်ကိုက မယုံနိုင်လောက်အောင် ကောင်းမွန်ပြီးသား ဆက်သွယ်မှုစနစ်တစ်ခုပဲ။ သူ့မှာ ဆက်သွယ်ဖို့ တခြားစကားလုံး တွေမလိုဘူး။ ကိုယ့်စိတ်ထဲ ဖြစ်ပေါ်လာတဲ့ခံစားချက်ကို ရုပ်လုံးဖော်ထားတာမို့ ဘေးလူက လာပြီး မကောင်းဘူး၊ မှားတယ်လို့ ကောက်ချက်ချလို့ မရဘူး။ ကိုယ်နှစ်သက်ရင်ကောင်းတာပဲ၊ ကောင်းရင် မှန်တာပဲ။ ဘယ်ဟာမှန်တယ် ဘယ်ဟာကောင်းတယ်ဆိုတာကို သူများက စကားလုံးတွေနဲ့ လာပြောနေဖို့မလိုဘူး...
ကိုယ့်လက်နဲ့ကိုယ်စမ်းကြည့်ပြီး ကောင်းတယ်မကောင်းဘူးဆိုတာ ကိုယ့်ဟာကိုယ် သိပါတယ်။ ကိုယ့်ဟာကိုယ် ဖန်တီးနိုင်တယ်၊ ကိုယ့်ဟာကိုယ် အောင်မြင်နိုင်တယ်၊ ဒါပါပဲ။ လူ့ဘဝမှာ တစ်ခုခုတော့ စွမ်းဆောင်နိုင်ခဲ့တယ်ဆိုတဲ့ ခံစားချက်မျိုး ရှိဖို့ လူတိုင်းလိုတယ်''
ရှံဆုန်ရဲ့စကားတွေဟာ ကျွန်မအတွက် အဓိကလိုအပ်ချက် အင်အားတွေပါပဲ။ သူပြောတဲ့အတိုင်း တစ်ခုခုတော့ စွမ်းဆောင် နိုင်ခဲ့တယ်ဆိုတဲ့ ခံစားချက်မျိုးရှိဖို့ ကျွန်မ စိတ်တွေပြင်းပြလာပြီး လူ့အရွယ်အစားထက်ကြီးတဲ့ ကျောက်ပန်းပုရုပ်တစ်ခုကို စတင် ထုဆစ်ပါတော့တယ်။
အဲဒီမှာ နှာခေါင်းထဲကို ကျောက်မှုန့်တွေမဝင်အောင် နှာခေါင်းကိုအုပ်ပြီး အောက်စီဂျင်ပိုက်နဲ့တောင်အသက်ရှူရတဲ့အထိပါပဲ။ မျက်စိထဲကျောက်မှုန့်တွေ ဆိုးဆိုးရွားရွား မဝင်အောင် မျက်မှန်အကြီးကြီးတပ်ထားရပါသေးတယ်။ ဖြတ်စက်၊ လေရှူစက်၊ ပွတ်စက် စတဲ့ စက်ပစ္စည်းမျိုးစုံရဲ့ဆူညံသံတွေ ခံနိုင်ရည်ရှိအောင် နားတွေကိုလည်း နားပိတ်ပလပ်တွေတပ်ထားရတယ်။ ဒီကာလတွေဟာ ပြင်ပ လောကကြီးနဲ့ လုံးဝ အဆက်ပြတ်နေသလိုပဲ။ လက်ဖျားတွေနဲ့ ထိတွေ့လို့ရတဲ့ ခံစားမှုကလွဲပြီး ကျွန်မမှာ ဘာမှကိုမရှိတော့ဘူး။ လက်ဖျားနဲ့ ထိရ၊ တွေ့ရ၊ သိရတဲ့ခံစားမှုလေးပေါ်မူတည်ပြီး ကျွန်မဦးနှောက်က မှားတယ်၊ မှန်တယ်လို့ ဆုံးဖြတ်ပေးတဲ့အတိုင်း ကျွန်မ ဆက်ပြီး လုပ်သွားပါတယ်။
xxxxxx
ကျွန်မမျှော်လင့်တဲ့နေ့ကို ရောက်လာပါပြီ။ ကျွန်မရဲ့ပန်းပုလက်ရာတွေနဲ့ ရှံ့ဆုန်ရဲ့ပန်းချီလက်ရာတွေ ပူးပေါင်းခင်းကျင်းထားတဲ့ Man and Woman Art Exhibition ကို ဖွင့်လှစ်ပြသနိုင်ခဲ့ပါပြီ။ နေရာကတော့ ရှံဆုန်ရဲ့အိမ်ကြီးမှာပါ။ ခန်းမအလယ်မှာ ခန့်ညားစွာ နေရာယူထားတာကတော့ ကျွန်မရဲ့လက်ရာ ကျောက်သားပန်းပုရုပ်ကြီးပါပဲ။ လူတွေဟာ အဲဒီအရုပ်ကို အများဆုံးလှည့်ကြည့်ကြတယ်လို့ သိရပါတယ်။ ပြီးတော့ လက်ရာရှင် ကျွန်မကို မေးခွန်းတွေ လာလာထုတ်ကြတယ်။
''ဒီလောက် ကျားကျားလျားလျား ခံ့ညားနေတဲ့အရုပ်ရဲ့ မျက်လုံးတစ်ဖက်မှာ ဘာလို့မျက်ရည် တစ်စက် ခိုတွယ်နေပုံကို ထည့်လုပ်ရတာလဲ''တဲ့။
ဒီကိစ္စနဲ့ပတ်သက်ပြီး ကျွန်မ ဘာမှမဖြေလိုပါဘူး။ စကားလုံးတွေမရှိ၊ မေးခွန်းတွေမရှိ၊ အဖြေတွေမရှိတာဟာလည်း အနုပညာ ပါပဲလို့ ကျွန်မတော့ ခံယူ ထားမိတယ်။
အဲဒီမှာ ကျွန်မနေခဲ့ရတဲ့ မျက်မမြင်ကျောင်းက နည်းပြကြီးလည်း ကျွန်မရဲ့ပြပွဲဆီ ရောက်လာခဲ့ပါတယ်။ သူက ကျွန်မလက်ကို ဝမ်းသာအားရနဲ့ ဆွဲယမ်းလှုပ်ခါတယ်။ ပြီးတော့ တကယ့်ကို ကျွန်မအတွက် ဝမ်းသာလှိုက်လှဲပြီး တုန်ခိုက်တဲ့လေသံနဲ့ပြောလာတယ်။ ''သိပ်တော်တဲ့ ကမ္ဘာကျော်ပန်းပုဆရာမကြီးအတွက်''
ကျွန်မလက်ထဲ မွှေးပျံ့တဲ့ရနံ့နဲ့ပန်းစည်းတစ်စည်း ထည့်လာလို့ ရှိုးတိုးရှန့်တန့်နဲ့ လက်ခံယူရင်း ကျွန်မ တိတ်တခိုးလေး ပြုံးမိရ ပါသေးတယ်။။
လူတွေဟာ တိတ်တိတ်ဆိတ်ဆိတ်ကြည့်ရှုနေရာကနေ အသံဗလံတချို့ အုန်းအုန်းကျက်ကျက် ထွက်ပေါ်လာတယ်လို့ ကျွန်မ ထင်မိတယ်။
ကျွန်မ ထင်တဲ့အတိုင်းပါပဲ။
''ဧလိယရေ..လူတွေလှုပ်လှုပ်ရွရွ ဖြစ်နေကြတယ်၊ ဘာလို့ပါလိမ့်'' လို့ ရှံဆုန်က ကျွန်မ နားရွက်နားကပ်ပြီး အသံအုပ်အုပ်နဲ့ ပြောလာတယ်။
''အလို.. ''
''မင်းရဲ့အရုပ်ကြီးကို လူတွေ ပိုပြီးဝိုင်းကြည့်နေပါပေါ့လား၊ အဲဒီလူတွေဆီက အသံကွ၊ အလိုလေးလေး..အံ့သြစရာပဲ.. ဧလိယရေ.. အရုပ်ရဲ့ရှေ့မှာ ရပ်ကြည့်နေတဲ့ လူတစ်ယောက်ကိုကြည့်လိုက်၊ အရုပ်ကိုမော့ကြည့်လိုက်နဲ့ လူတွေ ကျွက်စီကျွက်စီ ဖြစ်နေကြတာကွ..၊ လာ..လာ တို့များ အနားသွားကြရအောင်''
ရှံဆုန်ဆွဲခေါ်ရာနောက် တုံ့ပယ်တုံ့ပယ်နဲ့ ကျွန်မ လိုက်ပါသွားတဲ့အခါ လူတွေရဲ့ အသံလှိုင်းတွေက ကျွတ်ကျွတ်ကျွက်ကျွက်နဲ့ ပိုပိုပြီးကျယ်လာတယ်။ စကားသံတွေကိုတောင် ပီပီသသ ကြားလာမိတယ်။ ရှံဆုန်က ကျွန်မ လက်ကိုဖျစ်ညှစ်ရင်း အံ့အားသင့်တဲ့ အသံနဲ့ တရစပ် ပြောပြန်တယ်။
''ဘုရားရေ...ဧလိယ၊ အဲဒါ ဘယ်သူလဲ၊ သူဘယ်သူလဲ။ မင်းရဲ့အရုပ်နဲ့ ချွတ်စွတ်တူတဲ့လူ၊ အံ့ဖွယ်တစ်ပါးပဲ ဧလိယရေ၊ သူ့ရဲ့မျက်လုံးတွေကအစ တစ်ထေရာတည်းပဲ.. သူ့မျက်လုံးထောင့်စွန်းမှာ မျက်ရည်တစ်စ စက်တွဲခိုနေပုံကအစ တကယ့်ကို ထပ်တူထပ်မျှ.....''
ရှံဆုန်ရဲ့ စကားမဆုံးနိုင်ခင်မှာပဲ ကျွန်မရဲ့နှုတ်ကနေ ခန်းမတစ်ခုလုံး မြည်ဟီး သွားမယ့် စကားတစ်ခွန်း ယောင်ယမ်း ထွက်သွားပါတယ်။
''အဖေ...''
ကျွန်မရဲ့အော်သံအဆုံးမှာ ကျွန်မတစ်ကိုယ်လုံးဟာ လူတစ်ယောက်ရဲ့ အားပါးတရသိမ်းကျုံးပွေ့ဖက်ခြင်းကို ရုတ်တရက် ထိတွေ့ခံစားလိုက်ရတယ်။ သူ့ရဲ့ရင်ခွင်ထဲကို မှန်းဆရင်း ကျွန်မဦးခေါင်းနဲ့ အတင်းတိုးဝှေ့ဝင်လိုက်ပြီး တဆတ်ဆတ် တုန်ယင်နေတဲ့ လက်အစုံနဲ့ သူ့ကို သိမ်းကျုံးပြီး ကျွန်မ ပြန်ဖက်ထားမိလိုက်တယ်။ ကျပ်ထုပ်နေအောင် အတင်းတွယ်ကပ် ဖက်ထားရင်းက ..
'အဖေ''အဖေနော်' 'ဟုတ်ပါတယ်နော်' ဒါ ကျွန်မရဲ့အဖေနော်´ လို့ တတွတ်တွတ်မေးမိတယ်။ ဝမ်းနည်းဝမ်းသာ တုန်ခိုက်နေ လွန်းလို့ ထင်ပါရဲ့။ သူ့ဆီက ဘာစကားသံမှ ထွက်မလာဘူး။ သူ့လက်ကြမ်းကြမ်းကြီးတွေနဲ့ ကျွန်မမျက်နှာအနှံ့ ဖွဖွလေး တို့ထိပွတ်သပ် ပေးနေတယ်။ မချင့်မရဲနဲ့ ကျွန်မပါးပြင်ကို သူ့ရင်ခွင်ထက် ကပ်သည်ထက်ကပ်အောင် တိုးကပ်ထားလိုက်တော့ ဒုတ်ခနဲ ဒုတ်ခနဲ ခပ်မြန်မြန်ကြီး ဆောင့်ဆောင့်မြည်နေတဲ့ အဖေ့ရဲ့ နှလုံးခုန်သံကို ကျွန်မ အတိုင်းသားကြီးကြားလိုက်ရပါတယ်။
''အရမ်းကိုတော်တဲ့ ပန်းပုဆရာမကြီးပါလားကွယ်''
အဖေ့ဆီက လှိုက်လှဲတဲ့ ချီးမွမ်းသံကို ကြားရတော့ ကျွန်မ ပထမတော့ သွေးနထင်ရောက်သွားပြီး ပြုံးရယ်လိုက်မိတယ်။ နောက်တော့မှ သတိပြန်ဝင်လာတယ်။
''ဟင့်အင်း..ဟင့်အင်း ကျွန်မမှာ မျက်စိမမြင်တဲ့ကြားက.......ခွင့်လွှတ်ပါ အဖေရယ်၊ ကျွန်မသာ မျက်စိမြင်ခဲ့ရင် ဒီ့ထက် အများကြီးပိုတော်တဲ့ ပန်းပုဆရာဖြစ်မှာ..၊ အဖေ့ပုံတူကို ဒီ့ထက်တူအောင် လုပ်နိုင်မှာပဲနော်...နော်...''
အဲသည်လို မချိတင်ကဲ ပြန်ပြောမိတော့ အဖေက ကျွန်မဆံပင်တွေထဲကို သူ့လက်ချောင်းတွေ ဖွဖွထိုးသွင်းပြီး ကပျာကသီ ဖြေရှင်းချက်ထုတ်တယ်။
''မထင်ပါနဲ့ကွယ်၊ ငါ့သမီးသာ မျက်စိမြင်ခဲ့ရင် ဒီ့ထက် ပိုညံ့သွားမှာပေါ့'' တဲ့။
''အို..''
ကျွန်မ အဖေ့စကားကို သဘောကျသွားပြီး ရှက်ပြုံးလေး ပြုံးရင်း ငြိမ်နေမိတယ်။
အို..အဲဒါတကယ်ပဲလားဟင်...။
ကျွန်မသာ မျက်စိမြင်ခဲ့ရင် ပိုတော်တဲ့ပန်းပုဆရာမ ဖြစ်နိုင်သလား..။
ဒါမှမဟုတ် အဖေ ပြောသလို ပိုညံ့တဲ့ပန်းပုဆရာမ ဖြစ်သွားမှာလား.........။
(၂ဝဝ၅၊ ဒီဇင်ဘာ၊ ပန် အနုပညာမဂ္ဂဇင်း)
No comments:
Post a Comment