ထူးထူးထွေထွေ နှစ်သစ်ကူးပွဲတော်တွေ

နှစ်သစ် တစ်နှစ်ကိုရောက်လာတော့မယ်။

နှစ်သစ်ကူးပွဲတော်တွေအကြောင်း ၂၀၁၃ ကရေးထားတာပြန်တင်ထားလိုက်ပါတယ်။ ဖတ်ချင်တဲ့သူအလွယ်တကူရှာတွေ့အောင်ပါ။
ကျန်နေသေးတဲ့နိုင်ငံတွေရဲ့ နှစ်သစ်ကူးရိုးရာဓလေ့တွေရေးနိုင်ဖို့ ကြိုးစားပါဦးမယ်။

Merry Christmas !

မိတ်ဆွေ သူငယ်ချင်းတွေကို ချစ်ခင်လေးစားစွာဖြင့်

နှစ်သစ်ကူးပွဲတော်တွေဟာ ကမ္ဘာတဝှမ်းမှာ လူမှုရေး၊ ယဉ်ကျေးမှု နဲ့ ဘာသာတရားအစဉ်အလာ လေးစားလိုက်နာမှုတွေနဲ့ ကျင်းပကြတဲ့ ပွဲတွေပါ။ နှစ်သစ်ရဲ့အစမှာပြုလုပ်ကြပါတယ်။ ရှေးအကျဆုံး၊ သက်တမ်းအရင့်ဆုံးပျော်ပွဲရွှင်ပွဲတွေဖြစ်ပြီး တစ်ကမ္ဘာလုံးက စောင့်ကြည့်ကြတယ်။ ကိုယ်တိုင် ပါဝင်ဆင်နွှဲကြပါတယ်။ အစောဆုံး နှစ်သစ်ကူးပွဲတော်ကို မက်ဆိုပိုတေးမီးယား(အာရှအနောက်တောင်ပိုင်းရှေးကျတဲ့ဒေသ၊ ဒီနေ့ခေတ်မှာတော့ အီရတ်နိုင်ငံပေါ့) အဲဒီမှာ 2000 BCE ခန့်က စတင်ကျင်းပခဲ့ကြတယ်လို့ဆိုတယ်။ အဲဒီနေရာမှာ “ဘေဘီလုံတွေရဲ့ နှစ်သစ်” Akitu ပွဲတော်ကို နွေဦးအလွန်(မတ်လလယ်) လဆန်းပိုင်းတွေကျင်းပကြတယ်။ တီးဂရစ်မြစ်အထက်ပိုင်းဒေသ အဆီးရီးယားမှာတော့ ဆောင်းဦးကာလ (စက်တင်ဘာလလယ်)လောက်မှာ ကျင်းပကြပြန်တယ်။ အီဂျစ်တွေ၊ ဖိုးနီးရှန်း နဲ့ ပါရှန်းတွေက စက်တင်ဘာ ၂၁ ရက်(ဆောင်းဦး)၊ ခေတ်ဦး ဂရိတွေကတော့ ဆောင်းကာလ ဒီဇင်ဘာ ၂၁ ရက်နေ့မှာ နှစ်သစ်ကူးပွဲတော်တွေကို အစောဆုံးကျင်းပဆင်နွှဲခဲ့ကြတာပါ။ အလယ်ခေတ် ခေတ်ဦးပိုင်းမှာတော့ ဥရောပတစ်လျှောက် ခရစ်ယာန်ဘာသာဝင်တွေဟာ မတ်လ ၂၅မှာ နှစ်သစ်ကူးအဖြစ်  စားသောက်ပွဲကြီးကိုကြေညာကျင်းပခဲ့ကြတယ်။ ရိုမန်ကက်သစ်ဘုရားကျောင်းက ၁၅၈၂ မှာ အသုံးပြခဲု့ကြတဲ့ ဂရီဂိုရီရန် ပြက္ခဒိန်အရ နှစ်သစ်ကူးနေ့ကို ဇန်နဝါရီ ၁ ရက် နေ့မှာ သတ်မှတ်ကျင်းပလိုက်ကြတယ်။ နောက်ပိုင်း တဖြည်းဖြည်းချင်း ဥရောပတိုင်းပြည်အများစုလည်း အဲဒီ ဇန်နဝါရီ ၁ ရက်နေ့ ကိုပဲ နှစ်သစ်ကူးနေ့အဖြစ် လိုက်နာကျင်းပလာခဲ့ကြပါတယ်။ စကော့တလန်က ၁၆၆၀၊ ဂျာမနီနဲ့ ဒိန်းမတ်က ၁၇၀၀၊ အင်္ဂလန်က ၁၇၅၂ နဲ့ ရုရှားက ၁၉၁၈ ခုနှစ်တွေမှာ နှစ်သစ်ကူးနေ့ ကို ဇန်နဝါရီ ၁ ရက် နေ့မှာ ပွဲလမ်းသဘင်အခမ်းအနားတွေနဲ့ ဆင်နွှဲလာကြတာပါ။

ဒီနေ့ခေတ်ထဲက ကမ္ဘာကြီးရဲ့ နေရာဒေသအသီးသီးမှာ နေထိုင်ကြတဲ့ လူမျိုးစုံဟာ နှစ်သစ်ကူးပွဲတော်ကို အမျိုးမျိုး အဖုံဖုံ၊ အချိန်၊ ကျင်းပပုံတွေ ကွဲပြားစွာ ပြုလုပ်ကျင်းပနေကြပါတယ်။ ဘာကြောင့်လည်းဆိုတော့ ကွဲပြားတဲ့လူမျိုးစုံဟာ ကွဲပြားတဲ့ပြက္ခဒိန်တွေ အသုံးပြုကြတာကြောင့်ပါ။ တရုတ် နဲ့ အစ္စရေးက Lunar ပြက္ခဒိန်ကို အသုံးပြုကြတယ်။ အဲဒီပြက္ခဒိန်က ကမ္ဘာတစ်ဝှမ်းလရွေ့လျားမှုပေါ်အခြေခံထားပါတယ်။ တချို့တိုင်းပြည်တွေကျပြန်တော့ ကောက်သစ်စ တဲ့အချိန် ကောက်ပင်တွေကြီးထွားရှင်သန်ကြတဲ့ နွေဦးကာလတွေ၊ ဆောင်းဦးလို ကောင်ပင်သီးနှံတွေရိတ်သိမ်းကြတဲ့  ဆောင်းဦးကာလတွေဆိုပြီး နှစ်သစ်ကူးပွဲတော်ကို ကျင်းပကြတာပါ။ နှစ်သစ်ကို ကြိုဆိုကြတဲ့အခါ လူကြီး၊ လူငယ်တွေ ပါဝင်ဆင်နွှဲပုံတွေကလည်း အမျိုးမျိုးကွဲပြားနေကြတာပါပဲ။ အခု ကမ္ဘာတစ်ဝှမ်းလှည့်လည်ပြီး နှစ်သစ်ကူးပွဲတော်ရက်တွေကို ဆင်နွှဲကြည့်ကြရအောင်နော်။
(အချိန်အကန့်အသတ်ကြောင့်တခြားတိုင်းပြည်တွေက ကွဲပြားတဲ့ နှစ်သစ်ကူးပွဲတော်တွေ အကုန်မရေးလိုက်နိုင်ခဲ့ပါဘူး။)

ဂျပန်နှစ်သစ်ကူးပွဲတော် - ရှိုဂါ့ဆု(shōgatsu) ပွဲတော်နေ့ကို ဇန်နဝါရီ ၁ ရက်နေ့မှာပဲ နှစ်စဉ်ကျင်းပကြတယ်။ အဲဒီရက်တွေဟာ အင်မတန်အလုပ်ရှုပ်ကြတဲ့ ပွဲတော်နေ့တွေပါတဲ့။ အထူးသဖြင့် နှစ်သစ်ကူးနေ့မတိုင်ခင်တစ်ရက် နှစ်တစ်နှစ်ရဲ့ နောက်ဆုံးရက် အိုမီဆိုကာ(Ōmisoka)မှာ အလုပ်အများဆုံးပါပဲ။ ဂျပန်တွေရဲ့ နှစ်သစ်ကူးပွဲတော်ကို ဂရီဂိုရီရန် ပြက္ခဒိန်အသုံးပြုခဲ့ကြတဲ့ ၁၈၇၃ ခုနှစ်ကနေ ဇန်နဝါရီ ၁ ရက်နေ့မှာ စတင်ကျင်းပခဲ့ကြတယ်။ အိုကီနာဝါမှာတော့ တရုတ်၊ ကိုရီးယား နဲ့ ဗီယက်နမ်နှစ်သစ်ကူးနေ့တွေလိုပဲ ကျင်းပနေကြဆဲပါ။ နှစ်သစ်ကူးပွဲအတွက် ရေညှိပြုတ်၊ ငါးအသားလွှာ၊ သစ်အယ်သီးအာလူးမွှေ၊ ဆူပွက်အောင်ပြုတ်ထားတဲ့ ဘားဒေါ့ခ်အမြစ် နဲ့ အချိုကဲကဲ ပဲပိစပ်အနက် စတဲ့အမယ်စုံစားချင်စဖွယ် ပါဝင်တဲ့ အိုဆဲချီဟင်းလျာကို အထူးပြင်ဆင်ချက်ပြုတ်စားသောက်ကြပါတယ်။ အဲဒီဟင်းလျာတွေအများစုက ချို၊ ချဉ် အရသာနဲ့ အရည်မပါတဲ့အစားအစာမျိုးပါ။ ရေခဲသေတ္တာထဲထည့်သိမ်းစရာမလိုဘူးလို့ဆိုကြတယ်။ ရှေးကျတဲ့အချိန်ထဲက ပြင်ဆင်စားသောက်ကြတဲ့ဟင်းလျာပါ။  အိုဆဲချီ မှာတောင် အမျိုးမျိုးရှိကြပါတယ်။ တစ်နေရာမှာ စားခဲ့ပြီးတဲ့ဟင်းလျာကို နောက်ထပ်တစ်နေရာမှာ စားလေ့စားထမရှိတာက ဂျပန်တွေရဲ့ယုံကြည်မှုပါ။ (ကံမကောင်းဘူးလို့ယုံကြည်ထားတယ်။ တချို့နေရာတွေမှာ မစားဖို့တောင်တားမြစ်ထားတယ်လို့ ဆိုကြတယ်)။ နောက် ကျော်ကြားတဲ့ဟင်းလျာက အိုဇိုနီ လို့ ခေါ်တဲ့ ဆန်အရသာပြားနဲ့ ဂျပန်ဒေသထွက် အသီးအရွက်လတ်လတ်ဆတ်ဆတ်ထည့်ပြုတ်ထားတဲ့ စွပ်ပြုတ်ပါ။ အဲဒီဟင်းလျာတွေက ရှေးကျတဲ့ ဂျပန်နှစ်သစ်ကူးဟင်းလျာတွေပါ။ ဒီနေ့မှာတော့ ဆာရှီမီ နဲ့ ဆူရှီ တို့ကိုပဲ တရှိုက်မက်မက်စားသုံးပြီး နှစ်သစ်ကူးကြသတဲ့။ တခါတရံ ဂျပန်အစားအစာမဟုတ်တာကိုတောင် ဝိုင်းဖွဲ့စားသောက်ပြီး နှစ်သစ်ကိုကြိုနေကြပါပြီလို့ ဆိုတယ်။ ပြည့်တင်းနေတဲ့ ဝမ်းဗိုက်အတွက် အစာခြေဖို့အကူအညီပေးနိုင်တဲ့ ဆေးဘက်ဝင်အပင် ၇ မျိုးပါ ဆန်စွပ်ပြုတ်ကိုလည်း ကျွေးမွေးဧည့်ခံကြသတဲ့။ အဲဒီ ဆန်စွပ်ပြုတ်ကို ဂျင်ဂျစ်ဆု လို့ ခေါ်တဲ့ “လူသားတွေရဲ့ နေ့-Human Day” ဇန်နဝါရီလ ၇ ရက်နေ့မှာ ပြင်ဆင်ချက်ပြုတ်ကြတာပါ။

လူသားတွေရဲ့အပြစ် ၁၀၈ မျိုးကို ရှင်းလင်းပယ်ရှားစေဖို့ ဗုဒ္ဓဘာသာဘုရားကျောင်းတွေမှာ ခေါင်းလောင်း ၁၀၈ကြိမ်ထိုးကြတယ်။ တိုကျိုမှာ ညလယ်ခေါင်းလောင်းသံကို စောင့်ကြည့်နားထောင်ကြတာက ဂျပန်လူမျိုးတွေကို အစွဲဆောင်ဆုံးပါပဲ။ တစ်နှစ်လုံးက အပြစ်တွေခေါင်းလောင်းသံနဲ့အတူ ဝေးလွင့်သွားတယ်လို့ ယုံကြည်ကြတာကြောင့်ပါ။ ခေါင်းလောင်းသံနားထောင်ပြီးရင်တော့ နာဂါနိုဒေသအအစားအစာ “ဆိုဘာခေါက်ဆွဲ”စားသောက်ပွဲကျင်းပကြတယ်တဲ့။ ကလေးငယ်တွေကို ပိုချီဘူကူရို ခေါ်တဲ့စာအိတ်လှလှလေးတွေထဲ ပိုက်ဆံထည့်ပြီးပေးကြတယ်။ “ပထမဆုံးနေမင်း” “ပထမဆုံး အရယ်အပြုံး” “ပထမဆုံးအိပ်မက်” စတဲ့ ဟိုက္ကူကဗျာမျိုးတွေလည်း နှစ်သစ်ကူးနေ့မှာ ရွတ်ဆိုကြတယ်။ “ဘီသိုဗန်ရဲ့ နဝမမြောက်တေးသွား” သံစုံတေးဂီတဖျော်ဖြေပွဲတွေ နှစ်သစ်ကူးကာလမှာ ပြုလုပ်ကြတယ်။ ပထမကမ္ဘာစစ်အတွင်း ဂျာမန်စစ်သုံ့ပန်းကိုးဦးက အဲဒီ “နဝမမြောက်တေးသွား”ကို မိတ်ဆက်ခဲ့ကြတယ်တဲ့။ “ဟက်ဆုရှိနိုဒဲ” လို့ ခေါ်တဲ့ နှစ်တစ်နှစ်ရဲ့ ပထမဆုံးနေထွက်ချိန်ကို စောင့်ကြည့်ကြတာကလည်း အလေးအနက်ဂရုပြုလုပ်ဆောင်ကြတယ်။ ကမ်းခြေ ဒါမှမဟုတ် တောင်ပေါ်ကို တက်ကြပြီး နေထွက်ချိန်ကို စောင့်ကြည့်ကြပါတယ်။

* * * * * * * * * * * * * * * * * *

စကော့လူမျိုးတွေရဲ့ နှစ်သစ်ကူး - ဟောဂ့်မနေ(Hogmanay) လို့ ခေါ်တဲ့ နောက်ဆုံးနေ့ဆိုတဲ့စကားလုံးနဲ့ အခမ်းအနားကို ဇန်နဝါရီ ၁ ရက်နေ့မှာ ပြုလုပ်ကျင်းပကြတာပါ။ ဟောဂ့်မနေ အစကတော့ ဆောင်းတွင်း အီကွေတာနဲ့ မြောက်ဘက်အဝေးဆုံး နေ ရောက်သွားတဲ့အချိန် ဇွန်လ ၂၂ ရက်နေ့မှာ အခြေခံခဲ့တယ်။ ကောက်ရိတ်သိမ်းပွဲအချိန်မျိုးမှာ ပြုလုပ်ကြပါတယ်။ Yule ခရစ်စမတ်ပွဲတော်ချိန် ၁၂ ရက်ကို “ရူးကြောင်ကြောင်နေ့” ဆိုပြီး စကော့တလန်မှာ ခေါ်ကြသေးတယ်။ အဲဒီခရစ်စမတ်ပွဲတွေကနေ ပြောင်းလဲ ကျင်းပလာတဲ့ နှစ်သစ်ကူးနေ့မှာ ဓလေ့ထုံးစံတွေက အများကြီးပဲ ရှိကြတယ်။ အဲဒီထဲကမှ တစ်နိုင်ငံလုံး ကျယ်ကျယ်ပြန့်ပြန်ပြုလုပ်ကြတာက “ပထမဆုံးခြေလှမ်းစတင်ခြင်း (First-Footing)” ပါ။ အဲဒီပွဲကို နှစ်သစ်ကူးပြီး သန်းခေါင်ယံအကျော်မှာ ချက်ချင်းပြုလုပ်ပါတယ်။ ပထမဆုံးခြေလှမ်းစတင်ခြင်း ဆင်နွှဲမယ့်သူဟာ အိမ်မှာ နေထိုင်တဲ့သူဖြစ်ရမယ်လို့ ဆိုပေမယ့် အိမ်နီးချင်း၊ သူငယ်ချင်းတွေလည်း ပြုလုပ်ကြတယ်။ အဲဒီသူဟာ မစတင်ခင် အိမ်ထဲမှာ ရှိမနေရပါဘူး။ သန်းခေါင်ယံကျော်တာနဲ့ အိမ်တံခါးမကနေ အိမ်ထဲကိုလှမ်းဝင်တယ်။ ဆား (ဒီနေ့ခေတ်မှာတော့ ဆားယူဆောင်လာသူနည်းပါးသွားပါပြီ)၊ ကျောက်မီးသွေး၊ ပေါင်မုန့်အဝိုင်းပြား၊ ဝီစကီ နဲ့ သစ်သီးကိတ်တွေ လက်ဆောင်ပေးပါတယ်။ အိမ်ပိုင်ရှင်ဆီကို ကံကောင်းခြင်းတွေသယ်ဆောင်လာတဲ့ရည်ရွယ်ချက်နဲ့ပါ။ လက်ဆောင်အဖြစ်ပေးတဲ့ စားစရာ၊ အဖျော်ယမကာတွေကိုတော့ ဧည့်သည်တွေကို ကျွေးမွေးဧည့်ခံကြပါတယ်။ ပထမခြေလှမ်းစတင်ခြင်း ဆင်နွှဲသူဟာ ဆံပင်နက်မှောင်သန်စွမ်းတဲ့ အမျိုးသားဖြစ်ရမယ်။ အရပ်ရှည်ရမယ်တဲ့။ အမျိုးသမီး ဒါမှမဟုတ် ဆံပင်ကျဲပါးသူအမျိုးသားဟာ ကံမကောင်းဘူးလို့ တချို့နေရာဒေသတွေမှာ ယုံကြည်ကြလို့ပါ။ အချင်း ၂ ပေ ခန့်ရှိတဲ့ သတင်းစာ၊ တုတ်၊ အဝတ်အကြမ်းစတွေနဲ့ မီးဘောလုံး လုပ်ပြီး မီးမကူးနိုင်တဲ့လက်ကိုင်သားနဲ့ တွယ်ဆက်ကာ လှည့်ပတ်ဝှေ့ယမ်းပြီး လမ်းတစ်လျှောက်လှည့်လည်ကြတယ်။ အဲဒီ မီးအလှပြပွဲမျိုးကို လူတွေအများကြီးက စောင့်ပြီးကြည့်ကြတယ်။ နှစ်သက်သဘောကျကြပါတယ်။ ဒီဘက်ခေတ်မှာတော့ သန်းခေါင်ယံအချိန်စောင့်ဆိုင်းနေကြရတဲ့ လူအုပ်ကြီးကို တခြားဖျော်ဖြေမှုတွေပါ ပေါင်းစပ်ဖျော်ဖြေလာကြတယ်။ မီးအလှပြကစားနည်းအစုံ နဲ့ ခရာမှုတ်ဂီတဝိုင်းတွေက လမ်းတစ်လျှောက် တဗြုန်းဗြုန်းတဒိုင်းဒိုင်းတီးခတ်ပြီး နှစ်သစ်ကူးအချိန်ကို စောင့်မျှော်ကြတာပါ။  ၁၈ရာစုက စကော့ထ်ကဗျာဆရာ Robert Burns ရဲ့ “Auld Lang Syne(Old Long Since)” သီချင်းကို နှစ်သစ်ကူးသီချင်းအဖြစ် နှစ်သစ်ကူးတဲ့အချိန်မှာ လက်မောင်းချင်းချိတ်လို့ သံပြိုင်သီဆိုကြသေးတယ်။ စကော့ထ်က အကြီးဆုံးမြို့တော်တွေဖြစ်တဲ့ ဂလပ်စ်ဂိုး၊ အီဒင်ဘာဂ် နဲ့ အဘာဒီးန် တို့မှာ တစ်ညလုံး ပျော်ပွဲဆင်နွဲကြတယ်။ မီးအလှပြပွဲကို လေပြင်းကျတဲ့ နှစ်တွေမှာတော့ ဖျက်သိမ်းတာမျိုးတွေရှိပါတယ်။ Handsel နေ့ မှာ အလုပ်ရှင်က ဝန်ထမ်းတွေဆီ၊ မိဘက သားသမီးတွေဆီ၊ ဆရာဆရာမတွေက ကျောင်းသူကျောင်းသားတွေဆီကို လက်ဆောင်လေးတွေပေးကြပါသေးတယ်။ Handsel ဆိုတာ လက်ဆောင်ဗူးကို ရည်ညွှန်းတဲ့စကားလုံးပါ။

* * * * * * * * * * * * * * * * * *

ကမ္ဗောဒီးယားနှစ်သစ်ကူး - Chaul Chnam Thmey “နှစ်သစ်ထဲဝင်ရောက်ခြင်း” ဟာ နှစ်သစ်ကူးမှာပြုလုပ်တဲ့ ကမ္ဗောဒီယန်းအားလပ်ရက်တွေပါ။ နှစ်သစ်ကူးနေ့ကနေ စတင်ပြီး ၃ ရက်ပြုလုပ်ကြပါတယ်။ ကောက်ရိတ်သိမ်းပွဲအပြီး ဧပြီ ၁၃ ၊ ၁၄ ရက်တွေမှာ စတင်ကျင်းပကြတယ်။ ခမာလူမျိုးတွေရဲ့ နှစ်သစ်ကူးဟာ အိန္ဒိယဒေသအတော်များများ၊ မြန်မာနဲ့ ထိုင်းနိုင်ငံ နှစ်သစ်ကူးအချိန်ကာလတွေနဲ့ တစ်ချိန်တည်းကျရောက်ပါတယ်။ ကမ္ဗောဒီးယန်းတွေကလည်း ဗုဒ္ဓဘာသာပြက္ခဒိန်ကို အခြေခံကြတာကြောင့်ပါ။ Maha Songkran ဟာ နှစ်သစ်ကူးပထမနေ့အမည်ပါ။ ခမာရိုးရာအဝတ်အစားတွေဝတ်ဆင်တယ်။ ဘုရားမှာ မီးပူဇော်ကြတယ်။ အမွှေးတိုင်တွေထွန်းကြပါတယ်။ ဗုဒ္ဓအဆုံးအမအတိုင်း ဦးညွှတ်ဂါရဝပြုကြတယ်။ ဒူးတုပ်ဝပ်တွားပြီး ရှိခိုးဦးခိုက်ကြပါတယ်။ ကံကောင်းစေဖို့ မနက်ခင်းမှာမြင့်မြတ်တဲ့ရေနဲ့ မျက်နှာကို ဆေးကြောသန့်စင်ကြပါတယ်။ နေ့လည်ခင်းပိုင်းမှာ ရင်ဘတ်ပိုင်း၊ ညပိုင်းမှာ ခြေထောက်စသည်ဖြင့် မြင့်မြတ်တဲ့ရေနဲ့ ဆေးကြောပြီး အိပ်ရာဝင်ကြတယ်။ Virak Wanabat  ကတော့ ဒုတိယနေ့ပါ။ အဲဒီနေ့မှာ ဆင်းရဲနွမ်းပါးသူ၊ အိုးအိမ်မရှိသူ၊ ဝင်ငွေနည်းပါးကြတဲ့ မိသားစုတွေကို ငွေကြေးအထောက်အပံ့အလှူအတန်းပြုလုပ်ကြတယ်။ မိသားစုလိုက် ဘုန်းကြီးကျောင်းတွေကို သွားရောက်ပြီး ဘိုးဘွားတွေကို ဂါရဝပြုကြပါတယ်။ T'ngai Leang Saka က တတိယနှစ်သစ်ကူးနေ့ပါ။ ဗုဒ္ဓရုပ်ပွားဆင်းတုတော်တွေကို အမွှေးအကြိုင်ပက်ဖျန်းထားတဲ့ရေနဲ့ ရေသန့်စင်ဆေးကြောကြတယ်။ သက်ကြီးရွယ်အို ဘိုးဘွားတွေကိုလည်း ခြေသည်းလက်သည်းညှပ်ပေးတာ ခေါင်းလျှော်ပေးတာစသဖြင့်ကုသိုလ်ယူကြတယ်။ ဗုဒ္ဓရုပ်ပွားတော်တွေ ရေကုသိုလ်ယူဆေးကြောသန့်ရှင်းကြတဲ့အထိမ်းအမှတ်ကတော့ ရေဟာ အပင်တိုင်း၊ သက်ရှိတိုင်းအတွက်အဓိကလိုအပ်ချက်ဖြစ်ပြီး၊ အဲဒီလိုအပ်ချက်ကို ဖြည့်တင်းပေးတဲ့သဘောပါ။ အသက်ရှည်မယ်။ ကံကောင်းမယ်၊ ပျော်ရွှင်ကြည်နူးဖွယ်ရာတွေ ကြုံဆုံရမယ်။ အောင်မြင်ကြီးပွား စီးပွားဖြစ်ထွန်းစေတယ်လို့လည်း ယုံကြည်ပါတယ်။ မိဘ ဘိုးဘွားတွေကို ရေချိုးသန့်စင်ပေးတာဟာ အနာဂတ်အတွက် အကောင်းဆုံးဆန္ဒတွေနဲ့ ကောင်းတဲ့အကြံဥာဏ်တွေ ရရှိနိုင်ကြပါတယ် တဲ့။ တာဝတ္တိံသာနတ်ပြည်က စကြာမုနိစက္ကဘုရားစေတီတော်ကို ကိုယ်စားပြုတဲ့ သဲပုံစေတီပွဲတော်ကို ဘုရားကျောင်းကန်ဝန်းအတွင်းမှာ ပြုလုပ်ကျင်းပကြတယ်။ ခမာအခေါ် Kalan(ကောက်ညင်းကျည်ထောက်) ကိုလည်း နှစ်သစ်ကူးအထူးအစားအစာအဖြစ်တည်ခင်းဧည့်ခံတတ်ကြပါတယ်။ အုန်းသီး၊ အုန်းနို့ရည်နဲ့တွဲဖက် စားသောက်လေ့ရှိကြတယ်။

* * * * * * * * * * * * * * * * * *

အီရန်က နှစ်သစ်ကူး - နိုရာဇ့်(Nowruz) ဟာ အဇာဘိုင်ဂျန်၊ အီရန်လူမျိုးတွေရဲ့ နှစ်သစ်ကူးပွဲတော်ပါ။ ပါရှန်းနှစ်သစ်ကူးပွဲတော် လို့လည်း ရည်ညွှန်းကြပါတယ်။ အီရန်လူမျိုးတွေနဲ့ တခြား ယဉ်ကျေးမှုဆက်နွယ်သွားတဲ့ ဒေသတွေ၊ အာရှအလယ်ပိုင်း၊ ကော့ကေးဆပ်၊ တောင်အာရှ၊ တရုတ်အနောက်မြောက်၊ ပင်လယ်နက်အနီးဒေသတချို့နဲ့ ဘော်လ်ကန်ဒေသတချို့လူမျိုးစုတွေမှာလည်း နိုရာဇ့်နှစ်သစ်ကူးပွဲပြုလုပ်ကြတယ်။  အဲဒီနှစ်သစ်ကူးပွဲကို နွေဦးပထမဆုံးရက် ရယ်၊ အီရန်ပြက္ခဒိန်အရ နှစ်တစ်နှစ်ရဲ့ အစမှာ ကျင်းပကြတာပါ။ မီးညွန့်မီးတောက်တွေဟာ နိုရာဇ့်နှစ်သစ်ကူးပွဲတော်ရဲ့ သင်္ကေတပါ။ အီရန်မိသားစုဝင်တွေနှစ်သစ်ကူးအားလပ်ရက်တွေမှာ အတူဆုံဆည်းကြဖို့ကြိုးစားကြတယ်။ ရိုးရာဓလေ့စရိုက်တွေကို လေ့လာကြပါတယ်တဲ့။ ကမ္ဘာတစ်ဝှမ်းမှာအခြေချနေထိုင်ကြတဲ့ အီရန်လူမျိုးတွေအတွက် နိုရာဇ့်ပွဲတော်ကျင်းပဖို့ အခက်တွေ့နိုင်ပါတယ်။ လော့စ်အင်ဂျလိစ်၊ တိုရန်တို၊ နဲ့ ယူကေ(အဓိကအားဖြင့် လန်ဒန်)မှာ မီးပုံပွဲတော်ကျင်းပဖို့က ကိုယ့်အိမ်ကိုယ့်ဝန်းထဲမှာတောင် ပြုလုပ်ခွင့်မရှိပါဘူး။ တင်းတင်းကျပ်ကျပ်တားမြစ်ထားတာကြောင့်ပါ။ အဲဒီလိုနေ့မှာဆိုရင် တောင်ကယ်ရိုလိုင်းနားမှာ နေထိုင်ကြတဲ့ အီရန်လူမျိုးတွေဟာ ကမ်းခြေဘက်တွေဆီသွားပြီး မီးပုံပွဲနိုရာဇ့်ကို ကျင်းပကြတယ်။ အာဖဂန်မှာတော့ နိုရာဇ့်နှစ်သစ်ကူးပွဲတော်ကို ရိုးရာအစဉ်အလာအတိုင်း နေရာဒေအနှံ့အပြားကျင်းပပြုလုပ်ကြပါတယ်။ နိုရာဇ့် ရိုးရာထုံထမ်းအစဉ်အလာထဲမှာ ပန်းနီပွဲတော် Guli Surkh မှာ ကျူးလစ်ပန်းအနီရောင်တွေကို နှစ်သစ်ကူးမတိုင်မီ ရက်ပေါင်း ၄၀လောက်ကတည်းက Mazar-i-Sharif မြို့တွင်းတစ်ဝိုက် တောင်ကုန်း နဲ့ မြေပြန့်တွေမှာပါ စိုက်ပျိုးဖူးပွင့်စေတာပါ။ အဲဒီရက်တွေမှာဆိုရင် မာဇားအီရှာရစ်ဖ်မြို့ကိုလူပေါင်းများစွာသွားရောက်လည်ပတ်ကြတယ်။ နှစ်သစ်ကူးပွဲတော်ကို ဆင်နွှဲကြပါတယ်။ Jahenda Bālā ကိုတော့ နှစ်သစ်ကူး ပထမဆုံးနေ့မှာ ပြုလုပ်တာပါ။ အဲဒီနေ့မှာ အစိုးရအဖွဲ့ဝင်ထိပ်တန်းအရာရှိတွေဟာ မာဇားမြို့က “အပြာရောင်ဗလီ”မှာ ဘာသာရေးအခမ်းအနားတက်ရောက်ကြတယ်။ အများအားဖြင့် ဆွန်နီအစ္စလာမ်ဘာသာဝင် အာဖဂန်အများစုပါ။ မာဇားမြို့လယ်ပန်းခြံမှာဆိုရင် နိုရာဇ့်နှစ်သစ်ကူးပွဲတော်မှာ လူပေါင်း ၂ သိန်းခန့်တက်ရောက်ကြတာပါ။ နှစ်သစ်ကူးအထူးဟင်းလျာတွေမှာ Sabzi Chalaw လို့ခေါ်တဲ့ ဆန် နဲ့ စပီးနာ့ခ်ျရွက်ဟင်းလျာ၊ ကွတ်ကီးမုန့်အချိုတွေ နဲ့ Māhī wa Jelabī (ငါးကြော်နဲ့ ဂျလေဘီ)တို့ကို အများဆုံးဧည့်ခံကျွေးမွေးကြတယ်။ အီရန်မှာ နိုရာဇ့်ဟာ အရေးအပါဆုံးအားလပ်ရက်ပွဲတော်ပါ။ ယဇ်ပူဇော်ခံသူ Sumerian ဘုရားသခင်(Domuzi)ဟာ နှစ်တစ်နှစ်ရဲ့အကုန်မှာ အသတ်ခံရပြီး နှစ်သစ်မှာပြန်လည်မွေးဖွားလာသူတဲ့။


အဲဒီအယူအဆကို ကိုယ်စားပြုတဲ့ Hājī Firuz ဆိုတဲ့အမျိုးသားတစ်ဦးဟာ မျက်နှာမှာဆေးအမည်းရောင်တွေလိမ်းခြယ်ပြီး အနီရောင်ဝတ်စုံကိုဝတ်ဆင်တယ်။ သူက သီချင်းဆိုတယ်။ ကခုန်တယ်။ ချုတပ်ဗုံကို တီးတယ်။ ထရမ်းပက်လေမှုတ်ခရာနဲ့ တီးမှုတ်ကခုန်ဟာ လမ်းတွေမှာလှည့်လည်သွားလာပါတယ်တဲ့။  (အနက်ရောင်ဟာရှေးပါရှန်းလူမျိုးတွေရဲ့ ကံကောင်းစေတဲ့အရောင်ပါ) ကျေးရွာတွေမှာ မုတ်ဆိတ်ကျင်စွယ်ရှည်ရှည်လျားလျား အသက်ကြီးအမျိုးသားတစ်ဦးက အရောင်အသွေးစုံအဝတ်အစား၊ ဦးထုပ်ရှည်၊ စိပ်ပုတီးစသဖြင့်ဆင်မြန်းထားပြီး သဘာဝတရားပေးတဲ့စွမ်းအား၊ ကောင်းကျိုးအဝဝရရှိစေဖို့ ရွာလမ်းတစ်လျှောက်လှည့်လည်ဆုတောင်းတယ်။ လူတွေကို ငွေကြေးပေးကမ်းလှူဒါန်းတယ်၊ တရားဓမ္မရွတ်ဆိုသွားလာပါတယ်။ အဇာဘိုင်ဂျန် နိုရာဇ့်နှစ်သစ်ကူးပွဲတော်မှာတော့ တစ်လကြာမြင့်ပါတယ်။ အင်္ဂါနေ့တိုင်းမှာ ပွဲတော်အခမ်းအနားပြုလုပ်တယ်။ ရေ၊ မီး၊ မြေ နဲ့ လေ ဆိုပြီး တစ်လအတွင်းက ရက်သတ္တလေးပတ်စာ အင်္ဂါနေ့တွေမှာ အိမ်ရှင်းလင်းခြင်း၊ အပင်စိုက်ခြင်း၊ အဝတ်အစားသစ်ချုပ်ခြင်း၊ ကြက်ဥတွေကို ဆေးခြယ်ခြင်းလုပ်ကြတယ်။ ပြီးတော့ ရှာကာဘူရာ လို မုန့်ညက် စသည်ပြုလုပ်ပြီး စားပွဲသောက်ပွဲကျင်းပကြတာပါ။ အင်္ဂါနေ့တိုင်းမှာ မီးပုံပွဲပြုလုပ်ပြီး ဆုတောင်းပွဲတွေလည်းပြုလုပ်တယ်။ အားလပ်ရက်တွေမှာ ဂူသချိုင်းတွေသွားလာပြီး ဆုံးပါးခဲ့ပြီးတဲ့ ဆွေမျိုးတွေကိုလည်း ဂါရဝပြုကြပါတယ်။

* * * * * * * * * * * * * * * * * *

ဗီယက်နမ် နှစ်သစ်ကူးပွဲ - တက်ငုယင်ဒန်(Tết Nguyên Đán) အတိုကောက် “တက်” လို့ ခေါ်တဲ့ ဗီယက်နမ်နှစ်သစ်ကူးပွဲတော်ဟာ နွေဦးရောက်ရှိလာတဲ့အချိန် တရုတ်ပြက္ခဒိန်အရ Lunar နှစ်သစ်ရဲ့ ပထမဆုံးနေ့မှာ ပြုလုပ်တာပါ။ တရုတ်နှစ်သစ်ကူးနေ့နဲ့ အတူတူပါပဲ။ တရုတ်နိုင်ငံနဲ့ အချိန်တစ်နာရီ ကွားခြားတော့ လအသစ်ပေါ်ထွက်တဲ့အချိန်အတိအကျတွက်ချက်တဲ့အချိန်မှာသာ နည်းနည်းကွဲပြားမှုရှိတာပါ။ အားလပ်ရက် အထူးဟင်းလျာတွေချက်ပြုတ် ဧည့်ခံကြတယ်။ အိမ်တွေကို ရှင်းလင်းဆေးကြောကြပါတယ်။ နှစ်သစ်ကူးပထမနေ့မှာ မိတ်ဆွေတွေရဲ့ အိမ်ကို သွားရောက်လည်ပတ်တာ၊ ဘိုးဘွားတွေအတွက် ဝတ်ပြုဆုတောင်းတာ၊ နှစ်သစ်ဆုမွန်ကောင်းတောင်းတာ၊ ကလေးတွေနဲ့ သက်ကြီးရွယ်ကြီးတွေကို ငွေကြေးပေးကမ်းတာ ပြီးတော့ ဆိုင်ဖွင့်ပွဲမျိုး ပြုလုပ်ကြတယ်။ ဘုရားကျောင်းကန်တွေ ဖူးမျှော်ကြတယ်။ ပြီးခဲ့တဲ့နှစ်ဟောင်းကအခက်အခဲတွေ မေ့ဖျောက်ပြစ်ပြီး ပိုပြီးကောင်းတဲ့ နှစ်သစ်ကို မျှော်လင့်ကာ ဆုတောင်းကြတယ်။ ဗီယက်နမ်ဒေသ သုံးမျိုးမှာ တက် နှစ်ကူးပွဲတော်ကို သုံးမျိုး နှစ်သစ်မကူးခင်၊ နှစ်သစ်ကူးညနေ နဲ့ နှစ်သစ်ကူး ပွဲတော်ဆိုပြီး ၃ မျိုးပြုလုပ်ကြပါတယ်။ နှစ်သစ်ကူးညနေမရောက်ခင် ရက်သတ္တပတ် တစ်ပတ်၊ နှစ်ပတ်အလိုလောက်မှာ တက် နှစ်သစ်ကူးပွဲအတွက်ပြင်ဆင်ကြတယ်။ ဈေးဝယ်ထွက်ခြင်း၊ အိမ်အလှဆင်ခြင်း၊ ရိုးရာအစားအစာချက်ပြုတ်ခြင်းတွေလုပ်ကြတယ်။ ပြီးတော့ ဆွေမျိုးသားချင်းတွေ အိမ်ပြန်လာမယ့်အချိန်စောင့်မျှော်ကြပါတယ်။ ကြွေးမြီတွေရှိနေရင် အကုန်ပေးချေကြတယ်။ အဲဒါမှ တက် ပွဲတော်ကာလမှာ ကြွေးမြီကင်းကင်းနဲ့ လွတ်လွတ်လပ်လပ်ပျော်ရွှင်နိုင်မယ်လို့ ယုံကြည်ကြတယ်။ တက် ကာလ မှာ လမ်းပေါ်မှာလူတွေဟာ ပြည့်ကျပ်နေတယ်။ ဆိုင်တွေလည်းပိတ်ကြတယ်။ အဲဒါကြောင့် နှစ်သစ်မကူးခင်မှာ ကလေးတွေအတွက်အဝတ်အစားတွေကို ကြိုတင်ဝယ်ယူကြတယ်။ ပွဲတော်မှာ ဝတ်ဆင်ကြဖို့ပါ။ တက် ပွဲတော်မှာ စာအိတ်နီလေးတွေထဲ ပိုက်ဆံထည့်ပြီး ကလေးငယ်တွေကို လက်ဆောင်ပေးကြတယ်။

ကလေးငယ်တွေက အဝတ်အစားသစ်လေးတွေ ဝတ်ထားကြပါတယ်။ အစ်ကိုအစ်မ၊ အဖေအမေတွေ စာအိတ်နီလေးတွေမပေးခင် ကလေးတွေက အရင် ရိုးရာအစဉ်အလာအရ “တက်” နှုတ်ဆက်ကတ်ပြားလေးတွေပေးကြရတယ်။ တက် ပွဲတော်ချိန်မှာ တံမြက်စည်းလှည်းဖို့ တားမြစ်ပါတယ်။ ကံကောင်းခြင်းတွေလှဲထုတ်လွင့်ပစ်သလိုဖြစ်နိုင်တယ်ဆိုတဲ့ ယုံကြည်မှုနဲ့ပါ။ မိသားစုဝင်တစ်ဦးဦး လတ်တလောဆုံးပါးထားတဲ့သူဟာ မိတ်ဆွေတွေ အိမ်အလည်အပတ်မသွားနိုင်ပါဘူး။ တားမြစ်ပါတယ်။  အတိအကျလိုက်နာလုပ်ဆောင်ကြတာမဟုတ်ပေမယ့် တက် ပွဲတော်ဒုတိယနေ့မှာ မိတ်ဆွေသူငယ်ချင်း၊ တတိယနေ့မှာ ဆရာဆရာမတွေအတွက်ဆိုပြီး အလည်အပတ်ဖိတ်ခေါ်ကြတယ်တဲ့။ ဘုရားကျောင်းကန်တွေမှာ အလှူအတန်းပြုလုပ်ပြီး ကိုယ်အလိုရှိတဲ့ အနာဂတ်အတွက် ဆုတောင်းကြပါတယ်။ နှစ်သစ်ကူးရက်ကနေ တစ်ပတ်ခန့် လမ်းမတွေပေါ်မှာ မီးရှုန်းမီးပန်းပစ်ဖောက်တာ၊ စည်၊ ဗုံတွေတီးကြတာ၊ ခေါင်းလောင်း မောင်းတွေတီးပြီး ဆူညံတဲ့အသံတွေပြုလုပ်ကာ သရဲတစ္စေတွေကို နှင်ထုတ်တဲ့အလေ့အထလည်းရှိကြတယ်။ လမ်းတွေပေါ်မှာ ခြင်္သေနဂါး “Lan” အက ဖျော်ဖြေပွဲတွေလုပ်ကြတယ်။ အဲဒီ ခြင်္သေ့နဂါးဟာ မကောင်းဆိုးဝါး၊ သရဲတစ္စေတွေကို ခြောက်လှန့်မောင်းထုတ်နိုင်တဲ့ အစွမ်းရှိတယ်လို့ ယုံကြည်ထားကြတာကြောင့်ပါ။

ဂျူးလူမျိုးတွေရဲ့ နှစ်သစ်ကူး - ဟီဘရူးဘာသာ စကားလုံး ရောရှ့်ဟာရှာနာ(Rosh Hashanah) ဟာ “နှစ်တစ်နှစ်ရဲ့ ဦးခေါင်း” လို့ အဓိပ္ပါယ်ရပြီး ဂျူးတွေရဲ့ နှစ်သစ်ကူးပွဲတော်ပါ။ ဆောင်းဦးကာလမှာ ပြုလုပ်ကြတယ်။ နှစ်တစ်နှစ်မှာ ၇ လ သာရှိတဲ့ ဂျူးပြက္ခဒိန်အရ ပထမဆုံးလ Tishrei ရဲ့ ပထမဆုံးရက်မှာ နှစ်သစ်ကူးပွဲတော်ကျင်းပတာပါ။ အာဒံ နဲ့ ဧဝ တို့ ဖန်ဆင်းလိုက်တဲ့ နှစ်ပတ်လည်နေ့လို့လည်း ယုံကြည်ကြတယ်။ သမ္မာကျန်းစာထဲက သင်္ကေတအစားအစာတွေ ပျားရည်စိမ်ပန်းသီးလို မုန့်တွေစားကြတယ်။ “ပျော်ရွှင်ဖွယ်နှစ်သစ်ကူးဖြစ်ပါစေ”  ဟီဘရူးလို “Shanah Tovah” လို့ နှုတ်ခွန်းဆက်ကြပါတယ်။ နှစ်သစ်ကူးပွဲတော်မှာ shofar လို့ခေါ်တဲ့ လေမှုတ်ကိရိယာကို ဂျူးဘုရားကျောင်းတွေမှာတီးမှုတ်ပြီး နှစ်သစ်ကူးပွဲတော်ကျင်းပကြတယ်။ shofar လေမှုတ်ကိရိယာကို သိုးထီးရဲ့ဦးချိုနဲ့ပြုလုပ်ထားပြီး အရွယ်အစားမျိုးစုံ ရှိကြတယ်။ ခပ်ကွေ့ကွေ့တွှန့်လိမ်နေတဲ့မြွှေတစ်ကောင်လို ဦးချိုပုံစံကနေ အရွယ်ခပ်ကြီးကြီး shofar မျိုးထိ တွေ့မြင်နိုင်ပါတယ်။ ဂျူးဘာသာရေးအခမ်းအနားတွေမှာ အသုံးပြုကြတယ်။ နှစ်သစ်ကူးပွဲတော်အစားအသောက်တွေမှာတော့ ဓလေ့ထုံးထမ်းအစဉ်အလာတွေနဲ့ ပြင်ဆင်ကြတာပါ။ ဥပမာ “နှစ်တစ်နှစ်ရဲ့ ဦးခေါင်း”အဖြစ် ကိုယ်စားပြုချင်တာကြောင့် ငါးခေါင်းကိုချက်ပြုတ်ကြတယ်။ ပန်းသီးသကြားဖျော်ရည်၊ စွံပလွံသီး၊ သလဲသီး၊ မျက်ဆံနက်ပဲလုံး၊ မုန့်ညှက်နှောဖရုံသီး၊ ဂျုံ၊ နို့၊ ကြက်ဥနှစ်သုတ်လိမ်းပြီး ခပ်ကြွပ်ကြွပ်ကြော်ထားတဲ့ leek ကြက်သွန်မိတ်၊ သကြားမုံလာ နဲ့ ငါးကောင်လုံးဟင်းလျာတွေ ပြင်ဆင်တည်ခင်းကြတယ်။

* * * * * * * * * * * * * * * * * *

သြစတြီးယားမှာ နှစ်သစ်ကူးညနေခင်းကို မိသားစုဝင်တွေ၊ သူငယ်ချင်းတွေနဲ့ ဆင်နွှဲကြတာများပါတယ်။ ညသန်းခေါင်ယံအချိန်မှာ ORF တီဗီကနေ ဗီယင်နာမြို့St.Stephen’s Cathedral ဘုရားကျောင်းက ခေါင်းလောင်းကြီးက ထွက်ပေါ်လာမယ့် ခေါင်းလောင်းသံကို ထုတ်လွှင့်ပေးပါတယ်။ လမ်းတွေမှာ စင်မြင့်ဖျော်ဖြေပွဲတွေ၊ သံစုံတီးဝိုင်းတီးမှုတ်သံမြိုင်မြိုင်ဆိုင်ဆိုင်ကို နားထောင်ရမှာပါ။ မြူနီစီပယ်အစိုးရရုံးတွေကနေ မီးရှုးမီးပန်းတွေ ပစ်ဖောက်ကြသလို တစ်ဦးချင်းစီကလည်း ဆော့ကစားပြီး နှစ်သစ်ကူးကို ကြိုဆိုကြတယ်။

* * * * * * * * * * * * * * * * * *

ဒိန်းမတ်မှာ ဆိုရင် ပါတီပွဲတွေ သွားကြပါတယ်။ အိမ်တွေမှာ ပျော်ရွှင်စွာဆင်နွှဲကြပါတယ်။ နှစ်သစ်ကူးအတွက် အထူးပြုလုပ်ထားတဲ့ Kransekage ကိတ်(စက်ဝိုင်းအလွှာ အဆင့်ဆင့်ထပ်ထားပြီး ထိပ်ဆုံးမှာ ကတော့ပုံပါ မက်မွန်သီး၊ သကြား၊ ကြက်ဥအကာနဲ့ ပြုလုပ်ထားတဲ့ကိတ်မျိုး) နဲ့ ရှန်ပိန် တွဲဖက်ဧည်ခံကြတယ်။ တခြား ရိုးရာအစားအစာက cod ငါးပြုတ်၊ kale ဂေါ်ဖီပွင့်နှပ်၊ ဝက်ပေါင်သားဟင်းလျာတွေပါ။ အမဲဟင်းလျာ၊ ဆူရှီ တို့ကလည်း ဒီခေတ်မှာ ကျော်ကြားလာတဲ့ နှစ်သစ်ကူးအစားအစာတွေဖြစ်နေပါပြီ။ ဒီဇင်ဘာ ၃၁ ညနေ ၆ နာရီမှာ Amalienborg နန်းတော်ကနေ ဧကရာဇ်ဟာ နှစ်သစ်ကူးနှုတ်ဆက်စကားပြောကြားတယ်။ မြို့တော်ကိုပင်ဟေဂင်ရဲ့ သမိုင်းဝင် မြို့တော်ခန်းမနာရီစင်ကြီးက သန်းခေါင်းယံအချိန်မှာ တီးခတ်ပါတယ်။ မြို့တော်ခန်းမရင်ပြင်မှာ စုဝေးပြီး နှစ်သစ်ကူးကို ပျော်ရွှင်မြူးတူးစွာကြိုဆိုကြတယ်။ မြို့တော်ခန်းမမျှော်စင်ကနေ မီးရှုးမီးပန်းတွေ ကျဲပက်ပစ်ဖောက်ကြတယ်။

* * * * * * * * * * * * * * * * * *

လန်ဒန်ရဲ့ နှစ်သစ်ကူးပျော်ပွဲဆင်နွှဲတာက London Eye တစ်ဝိုက် နှစ်စဉ်လူပေါင်း ၂၅၀၀၀၀ ခန့်စုရုံးကြပြိး  ၈ မိနစ်စာ မီးရှုးမီးပန်းတွေ အလှပြဖောက်ခွဲတာကို စောင့်ကြည့်ကြပါတယ်။  ဇန်နဝါရီ ၁ ရက်နေ့မှာ တော့ နှစ်သစ်ကူးနေ့ ချီတက်ပွဲပြုလုပ်ကြတယ်။ Big Ben နာရီစင်ကြီးရဲ့ နာရီသံမြည်ဟည်းတဲ့အချိန်တိုင်းမှာ မီးရှုးမီးပန်းတွေ ထွက်ပေါ်လာလေ့ရှိတယ်။

* * * * * * * * * * * * * * * * * *

တရုတ်နိုင်ငံရဲ့ နှစ်သစ်ကူးပွဲတော်ကို နွေဦးပွဲတော်လို့လည်းခေါ်ကြတယ်။ တရုတ်ပြက္ခဒိန်အရ ပထမဆုံးနေ့ဟာ ၂၀၁၃ ခုနှစ်အတွက်ဆိုရင် ဖေဖော်ဝါရီ ၁၀ ရက်နေ့မှာ ကျရောက်ပါလိမ့်မယ်။ တရုတ်နှစ်သစ်ကူးပွဲတော်ဟာ ၁၅ရက်မြောက်နေ့မှာ မီးအိမ်ပွဲတော်နဲ့ အဆုံးသတ်လေ့ရှိတယ်။ ပြတင်းပေါက်၊ တံခါးတွေမှာ ကောင်းတဲ့အနာဂတ်၊ ပျော်ရွှင်ခြင်း၊ ချမ်းသာခြင်း၊ အသက်ရှည်ခြင်း စတဲ့ စာလုံးတွေရေးထားတဲ့ အနီရောင်စက္ကူလေးတွေ ကပ်ထားကြတယ်။ နှစ်သစ်ကူးဟင်းလျာတွေမှာ ဝက်သား၊ ဘဲသား၊ ကြက်သား နဲ့ အချို့မုန့်တွေ တည်ခင်းဧည့်ခံကြပါတယ်။ ကလေးငယ်တွေက နှစ်သစ်ကူးညက မီးရှုးမီးပန်းတွေဖောက်ကာဆော့ကစားပြီး မနက်မိုးလင်းလို့ အိပ်ရာနိုးထကြတဲ့အခါ မိဘတွေကို ပျော်ရွှင်ကျန်းမာချမ်းသာစေတဲ့ နှစ်သစ်ကူးဖြစ်ဖို့ ဆုတောင်းပေးကြတယ်။ မိဘတွေက ပိုက်ဆံထည့်ထားတဲ့ စာအိတ်နီလေးတွေကို လက်ဆောင်ပြန်ပြီး ပေးကြပါတယ်။ နဂါးအက၊ ခြသေံအကတွေ ကပြဖျော်ဖြေကြတယ်။ မိသားစုတွေ စုံလင်ကြတဲ့ ညမှာ ညစာစားပွဲကို hot pot ပြင်ဆင်ချက်ပြုတ်ကာ ဝိုင်းဖွဲ့စားသောက်ကြတယ်။ ခေါက်ဆွဲမျှင်ကို ပြုတ်တဲ့အခါ မကျိုးမပြတ်စေပဲ အရှည်အတိုင်း ရေဆူဆူမှာ ပြုတ်စေတယ်။ ခေါက်ဆွဲမကျိုးမပြတ်ပါမှ သက်ရှည်ကျန်းမာမယ်လို့ အယူရှိကြတယ်လို့ဆိုတယ်။

* * * * * * * * * * * * * * * * * *

ကိုးရီးယားနှစ်သစ်ကူးပွဲတော်က Lunar ပြက္ခဒိန်ရဲ့ ပထမဆုံးနေ့ပါပဲ။ ကိုးရီးယားရိုးရာအားလပ်ရက်အခမ်းအနားတွေထဲမှာ အရေးပါဆုံးပွဲတော်ပါ။ ဂရီဂိုရီပြက္ခဒိန်အရ ဇန်နဝါရီ ၁ ရက်နေ့ကိုလည်း နှစ်သစ်ကူးပွဲတော်အဖြစ်ကျင်းပကြသေးတာပါ။ နှစ်သစ်ကူးပွဲကို သုံးရက်ပြုလုပ်ကြတယ်။ ကိုးရီးယားလူမျိုးအများစုကတော့ hanbok လို့ခေါ်တဲ့ ကိုးရီးယားရိုးရာဝတ်စုံ အသွေးအရောင်စုံကို ဝတ်ဆင်ကာ ပွဲတော်မှာ ဆင်နွှဲကြတယ်။ နှစ်သစ်ရဲ့ ပထမဆုံးအလင်းရောင်ခြည်ဖြာကျပုံကို ကြည့်ရှုလိုကြတဲ့အခါ ဂျန်နူး၊ ဒွန်ဂေး နဲ့ ဂန်ဝူး ပြည်နယ်တွေကို သွားလေ့သွားထရှိကြတယ်။ ဆန်အရသာပြားနဲ့ ပြုလုပ်ထားတဲ့ Tteokguk စွပ်ပြုပ်ကို ကျွေးမွေးဧည့်ခံကြတယ်။ ကိုးရီးယားမွေးနေ့ပါတီမှာလည်း Tteokguk ကို ပြင်ဆင်ကျွေးမွေးကြပါတယ်။ Tteokguk တစ်ကြိမ်စားလိုက်တာနဲ့ အသက်တစ်နှစ်ကြီးသွားပါပြီ လို့ ဆိုကြတယ်။

* * * * * * * * * * * * * * * * * *

ဆွန်ကရန်(Songkran)လို့ ခေါ်တဲ့ ထိုင်းနိုင်ငံရဲ့ နှစ်သစ်ကူးပွဲတော်ကို ရိုးရာနှစ်သစ်ကူးနေ့ ဧပြီ ၁၃ ကနေ ဧပြီ ၁၅ ရက်နေ့အထိပြုလုပ်ကြပါတယ်။ တောင်အာရှ၊ အရှေ့တောင်အာရှ တိုင်းပြည်တွေရဲ့ နှစ်သစ်ကူးပွဲတော်တို့နဲ့ တစ်ချိန်တည်းကျလေ့ရှိတယ်။ ဆွန်ကရန်ပွဲတော်ဟာ တစ်နှစ်လုံးမှာ အပူဆုံးအချိန်ကျရောက်တာပါ။ ခြောက်သွေ့တဲ့ရာသီရဲ့ နောက်ဆုံးရက်တွေဆိုတော့ အပူရှိန်ပြင်းထန်တဲ့အချိန်မျိုးပါ။ ထိုင်းနိုင်ငံရဲ့ မြောက်ပိုင်းမြို့တော် ချင်းမိုင်မှာ နှစ်သစ်ကူးပွဲတော်ကို ၆ ရက်နဲ့ တခါတရံ ပိုပြီးကြာရှည်စွာကျင်းပကြတယ်။ ဆွန်ကရန်နှစ်သစ်ကူးပွဲတော်ကျင်းပပုံက ရေနဲ့ ပက်ဖြန်းဆော့ကစားကြတာပါ။ တချို့မိသားစုတွေလည်း မိသားစုလိုက် ဘုန်းကြီးကျောင်း၊ ဘုရားတွေ သွားရောက်ကြတယ်။ ဘုရားရုပ်ပွားတော်တွေကို ရေသပ္ပါယ်တာဟာ ကံကောင်းခြင်းတွေနဲ့ စီးပွားဖြစ်မယ်။ အောင်မြင်ကြီးပွားမှုတွေ ယူဆောင်လာမယ်လို့ ယုံကြည်ကြလို့ပါ။ သနပ်ခါး၊ မြေဖြူမှုန့်တွေ တစ်ဦးနဲ့ တစ်ဦးလိမ်းကျံတာလည်း ဆော့ကစားသူတွေ အင်မတန်စိတ်ဝင်စားကြတဲ့ နှစ်သစ်ကူးပျော်ပွဲဆင်နွှဲပုံပါပဲ။ 

* * * * * * * * * * * * * * * * * *

မြန်မာနိုင်ငံရဲ့ နှစ်သစ်ကူးပွဲတော်ကတော့ မြန်မာလို တန်ခူးလ အတွင်း(ဧပြီလ)မှာ ကျင်းပပြုလုပ်ကြတယ်။ ဧပြီ ၁၃ ကနေ ၁၆ ရက်နေ့အတွင်းမှာ ရေကစားတဲ့ သင်္ကြန်ပွဲတော်ဆင်နွှဲကြပါတယ်။ လူစည်ကားရာနေရာတွေမှာ မဏ္ဍာပ်တွေအပြိုင်ထိုးထားကြပြီး ရေပက်ဆော့ကစားကြတယ်။ နှစ်ဟောင်းကအညစ်အကြေးတွေ သင်္ကြန်မှာ ရေနဲ့ ဆေးကြောသန့်ရှင်းစေတယ်လို့ ယုံကြည်ကြပါတယ်။ အသွေးကျကျအဝါရောင်ပန်းလေးတွေဖြစ်တဲ့ ပိတောက်ပန်းက မြန်မာနှစ်သစ်ကူးကာလမှာမှ ပွင့်နိုင်ကြတာပါ။ ရပ်ကွက်တွေထဲက လမ်းထောင့်တွေမှာ ပရိတ်တရားရွတ်ဆိုကြတယ်။ အိမ်တိုင်းက ပရိတ်အိုးလေးတွေကို  အဲဒီပရိတ်တရားရွတ်ဆိုမယ့် လမ်းထောင့်မှာ တခြားပရိတ်အိုးတွေနဲ့အတူတင်ထားကြတယ်။ ဘုန်းကြီး ပရိတ်တရားနာပြီးတဲ့ အခါ ပရိတ်အိုးလေးတွေကို ပြန်ယူရပြီး ကိုယ့်အိမ်ထဲမှာ အရှေ့အနောက်တောင်မြောက် ထောင့်လေးထောင့် လိုက်လံဖြန်းပက်ကြပါတယ်။ အိမ်တွင်းမှာ ဘေးအန္တရာယ်ကင်းရှင်းတယ် လို့ ယုံကြည်ကြတယ်။ ပရိတ်အိုးမှာ နေ့သင့်နံသင့်အရွက်အပွင့်လေးတွေအစုံအလင်ထည့်ကြရတယ်။ အပ်ချည်လုံး(ပရိတ်ချည်)၊ သဲ စသည်ထည့်ကြပါတယ်။ နှစ်ဆန်းတစ်ရက်နေ့မှာ ငါးလွှတ်ပွဲ၊ ဘေးမဲ့လွှတ်ပွဲတွေ ရပ်ကွက်အလိုက် စုပေါင်းကုသိုလ်ယူပြုလုပ်ကြပါတယ်။  သက်ကြီးရွယ်အိုတွေကို ခေါင်းလျှော်ပေးခြင်း၊ လက်သည်းညှပ်ပေးခြင်းပြုလုပ်ပေးကြတယ်။ နှစ်သစ်ကူးညတွေမှာ “ငရန်နှင်ခြင်း” လို့ ခေါ်တဲ့ သရဲတစ္စေနှင်ထုတ်ခြင်းကို ဗုံ၊ သံပုံးတွေ တဗြောင်းဗြောင်းရိုက်ခတ်ပြီး ခြောက်လှန့်မောင်းထုတ်ကြတယ်။

နိုင်ငံတကာနှစ်သစ်ကူးပွဲတော်တွေထဲ ကိုယ်ပါ အတူတူ ပျော်ရွှင်စွာဆင်နွှဲနိုင်စေဖို့ ကမ္ဘာတစ်ဝှမ်းကအမျိုးမျိုးကွဲပြားတဲ့ နှစ်သစ်ကူးပွဲတော်လေးတွေကို ဖော်ပြပေးလိုက်ရပါတယ်။ နှစ်သစ်ကူးမှာ နွှဲပျော်ရင်း ပိုကောင်းတဲ့နှစ်သစ်ကိုယ်စီ လူတိုင်းလူတိုင်း ပိုင်ဆိုင်နိုင်စေဖို့ ဆုတောင်းမိရင်း။ ။

"ချစ်ခင်ရတဲ့ မိတ်ဆွေ၊ သူငယ်ချင်းများအားလုံး ပျော်ရွှင်ဖွယ်ရာနှစ်သစ်ပါ ...

နှစ်သစ်မှာ စိတ်ရော ကိုယ်ပါ ကျန်းမာပျော်ရွှင်ပါစေ ...

ရည်မှန်းချက်တွေ အကောင်အထည်ဖော်နိုင်ပါစေ"

စာဖတ်သူအားလုံးကို
ချစ်ခင်လေးစားစွာဖြင့်
ဖြိုးဖြိုး

Living Fashion Magazine, January, 2013