အိပ်မက်ထဲက ရှုတင်အိမ်

Family Magazine, March, 2014

အရင်ကတော့ အုတ်သားနီနီ၊
(မေမေ က ပြောတယ်။ အိပ်မက်ထဲက အိမ်က အနီရောင်မဟုတ်ဘူးလားတဲ့။ ဒီ ဓာတ်ပုံပို့ပေးတာနဲ့ တင်ထားလိုက်ရော။
တကယ်တော့ အိပ်မက်ထဲမှာ အိမ်အရောင်ထည့်မမက်တတ်ဘူး။ အိမ်အထဲက အက်ရှင်တွေပဲပါတယ် :D )

            အိပ်မက်ဆိုတာ စိတ်စွဲလမ်းမှုတွေကနေပြီး ပုံဖော်ဖန်တီးဖြစ်တဲ့ရုပ်ရှင်တစ်ကားလို့ တင်စားလိုက်ရတော့မည်ထင်ပါရဲ့။ သိစိတ်တွေနဲ့ လက်ရှိဘဝ၊ လက်ရှိနေအိမ်မှာ ကျွန်မ အဆက်မပြတ်လှုပ်ရှားရုန်းကန်ရင်းနဲ့ ပျော်ရွှင်ရယ်မောလိုက်၊ ငိုကြွေးလှိုက်မောလိုက်။ ဒီလို ခံစားချက်တွေအစီအရီ တစ်နေ့တာစီ ဖြတ်သန်းနေပါစေဦး၊ သိစိတ်ခဏတာခွာသွားတဲ့အချိန်၊ တစ်ညတာအိပ်စက်၊ အိပ်မက်ထဲမှာတော့ ကျွန်မ အိမ်တစ်အိမ်မှာ အမြဲလိုရှိနေတတ်သည်။ အိပ်မက်ထဲက ပြကွင်းပြကွက်တွေဟာ  ငယ်ငယ်က ကျွန်မလှုပ်ရှားရှင်သန်ခဲ့ရာ ပုံရိပ်တွေဖြစ်နေတတ်သည်။ အိမ်မက်ထဲက အိမ်ဟာ ကျွန်မ မွေးဖွားခဲ့ရာ ပျဉ်းမနားကအိမ်ဖြစ်ပါသည်။ အိပ်မက်ရုပ်ရှင်ထဲက ရှုတင်အိမ်က အမြဲပဲ ပျဉ်းမနားအိမ်ဖြစ်နေသည်မှာ အံ့သြစရာကောင်းလွန်းမနေဘူးလား။ တဆိတ်တော့ အံ့အားသင့်စရာကောင်းလှသည်။ ကျွန်မ အံ့အားသင့်စိတ်နဲ့ အတူ ဖွင့်ဟမိတော့ သူငယ်ချင်းတချို့က တို့များလည်းအတူတူပဲလို့ ခပ်သွက်သွက် ဆိုကြသည်။ ဒါဆို မထူးဆန်းဘူးပေါ့။ လူတိုင်းဒီလိုပဲဖြစ်နေခဲ့ပါသလား။ ကျွန်မ မိတ်ဆွေတချို့ကလွဲလို့ တခြားသူတွေရဲ့ အိပ်မက်ထဲကအိမ်ကိုတော့ ကျွန်မ မစူးစမ်းနိုင်သေးပါ။ ကျွန်မထင်နေတာက တကယ်ဆို ကျွန်မ လက်ရှိနေအိမ်၊ ကျွန်မလက်ရှိအခန်းမှာ ကျွန်မရဲ့လှုပ်ရှားမှုတွေဆိုတာ ဟိုဟိုဒီဒီ များလိုက်တာမှ ရုပ်ရှင်တစ်ကားလိုပြောရပြန်ရင်၊ ဇာတ်ဝင်ခန်းတွေ အများကြီးပဲမဟုတ်လား။ ဒီလို လှုပ်ရှားသရုပ်ဆောင်မှုတွေတော့ ဘာကြောင့်များ ကျွန်မရဲ့အိပ်မက်ရုပ်ရှင်အတွက် ဇာတ်ညွှန်းမရေးခဲ့သလဲ။ လက်ရှိနေအိမ်ကို ဘာကြောင့်အိပ်မက်ထည့်မမက်တတ်တာလဲ။ ကျွန်မ မသိပါ။ ကျွန်မရဲ့ မသိစိတ်ကို ကျွန်မ တကယ်ပဲ မသိနိုင်ခဲ့တာပါ။

            ကျွန်မ မသိစိတ်ကရိုက်ကူးဖြစ်နေတဲ့ အိပ်မက်ရုပ်ရှင်ထဲကဆက်တင်အိမ်ဟာ ပုပုအိုင့်အိုင့် လေးထောင့်နှစ်ထပ်အိမ်ပုံစံပါပဲ။ အိမ်မကြီးတစ်ဆောင် နဲ့ နောက်ထပ်အိမ်တစ်ဆောင်ရှိနေပါသည်။ အဲဒီအိမ်တစ်ဆောင်အပေါ်ထပ်မှာ ကျွန်မ အစ်ကိုသုံးယောက်နေကြသည်။ ယောက်ျားလေးခန်းလို့ ပြောရမှာပါ။ အောက်ထပ်ကတော့ ကျွန်မရဲ့ မေမေနေ့စဉ် တကုပ်ကုပ်အလုပ်ရှုပ်နေတတ်တဲ့ မီးဖိုဆောင်လေး။ ကျွန်မ နဲ့ အစ်မ သုံးယောက်ကတော့ အိမ်မကြီးဘက်မှာနေကြသည်။ ကျွန်မကတော့ မေမေနဲ့ အတူအိပ်လေ့ရှိသည်။ အိပ်မက်ရုပ်ရှင်ထဲမှာ ကျွန်မ မေမေ့ကို ထမင်း ဟင်း ချက်ပြုတ်ကူညီတာ တခါမှ မမက်ခဲ့ဘူးပါ။ အဲဒီအိပ်မက်ထဲမှာ တခါတရံ အစ်မလတ်ကို မီးဖိုခန်းထဲမှာ တွေ့ရတတ်သည်။ သားသမီးခုနှစ်ယောက်စာအတွက် ချက်ရပြုတ်ရတာ တနေ့တနေ့ မေမေ တော်တော်ပင်ပမ်းခဲ့မှာပဲ လို့ ကျွန်မ အရင်ကတော့ မတွေးတတ်ခဲ့ပါ။ ကျွန်မ နဲ့ နှစ်နှစ်အသက်ကွာတဲ့ အစ်ကိုအငယ်ဆုံးနဲ့ ဆော့ရဖို့ကိုပဲ ကျွန်မစိတ်ဝင်စားခဲ့ပါသည်။ မီးဖိုခန်းပြူတင်းပေါက်က သံတိုင်တွေကနေ ဆွဲကိုင်တွယ်ကပ်ပြီး အပေါ်ထပ်အစ်ကိုတွေအခန်းကို ရောက်အောင်တက်တတ်သေးသည်။ ကျွန်မရဲ့ အစ်ကိုငယ်ဆော့သမျှ ကျွန်မ အကုန်ဆော့ချင်ခဲ့သည်။ ဆော့လည်းဆော့ခဲ့တာပါပဲ။

           ကျွန်မဟာ မေမေ့စကားကိုလည်း အင်မတန်နားထောင်တတ်ခဲ့သေးသည်။ လွတ်လပ်ရေးနေ့တစ်ရက်က အဖြစ်အပျက်ကိုလည်း အဲဒီအချိန်တုန်းက အရွယ်တိုင်းပဲ အိမ်နဲ့အတူ ကျွန်မ အိပ်မက်မက်တတ်သည်။ မေမေ ကျွန်မကို သင်ထားတာက “လမ်းမပေါ်မှာများ ခွေးတွေများများတွေ့ပြီဆို၊ သမီးလေး ဟိုပြေးဒီပြေး မလုပ်ရဘူးနော်။ သူတို့ကိုလည်း ရန်မမူနဲ့၊ ခဲနဲ့ ကောက်ပစ်တာတို့၊ ရုတ်တရက်ထွက်ပြေးတာမျိုးမလုပ်လေနဲ့။ ကိုယ့်လမ်းကို အေးအေးဆေးဆေးသွားနော်”လို့ ပေါ့။ လွတ်လပ်ရေးနေ့မို့ လမ်းတွေကို ပိတ်ပြီး အားကစားပြိုင်ပွဲတွေလုပ်တတ်ကြသည်။ ကျွန်မ သွားနေကြလမ်းမှာ လူတွေက အပြည့် တိုးဝှေ့ဆော့ကစားနေကြတာ။ အဲဒီတော့ အရုပ်ဝယ်ချင်နေတဲ့ကျွန်မက အရုပ်ဆိုင်ကို ရောက်နိုင်တဲ့ နောက်ထပ်တစ်လမ်းကိုပဲ ရွေးရတော့သည်။ အဲဒီလမ်းမှာ ခွေးတွေအများကြီးပဲ မွေးထားတဲ့အိမ် နှစ်အိမ်လောက်ရှိနေသည်။ အဲဒီနှစ်အိမ်က ခွေးတွေဟာ လမ်းမပေါ်မှာပဲ အမြဲပြေးပြေးလွှားလွှားနေကြသည်။ နှစ်အိမ်လုံးကခွေးတွေဟာ မိတ်ဆွေဖွဲ့ကာဆော့ကစားနေတတ်ကြပြီး လမ်းမပေါ် ဖြတ်သွားဖြတ်လာလူတွေကိုတော့ ရန်သူဖွဲ့တတ်လေသည်။ ကျွန်မမှာ မေမေ မှာထားတဲ့စကားကိုပဲ ကြားယောင်ကာ ထွက်မပြေးရဲ၊ လှည့်လည်းမပြန်ဘဲနှင့် မိတ်ဆွေရန်သူဖွဲ့နေကြတဲ့ ခွေးအုပ်စုအလယ်တည့်တည့် တိုးဝင်မိရဲ့သားဖြစ်သွားခဲ့ရသည်။ ကိုယ့်လမ်းကိုယ်သွားဆိုတဲ့ မေမေ့စကားနဲ့ပဲ မတုန်မလှုပ်ရှေ့ဆက်သွားခဲ့လေသည်။ အဲဒီမှာပဲ အလုပ်ရှုပ်နေတဲ့ခွေးတစ်ကောင်ဟာ မျက်စိလည်းရှုပ်လာဟန်တူရဲ့ ကျွန်မရဲ့တင်ပါးကို ဆတ်ကနဲလှမ်းဟတ်လိုက်တော့သည်။ မေမေက ကျွန်မရယ် ကျွန်မအစ်ကိုရယ် ဆင်တူဝတ်စုံလေးတွေ ချုပ်ပေး၊ ဆင်ပေးလေ့ရှိသည်။ အဲဒီနေ့က ကျွန်မလည်း အစ်ကို့နဲ့ဆင်တူ ယောက်ျားလေးပုံ ဂျင်းသားထူထူ၊ အိပ်ကပ်ထူထူလေးနှစ်ဘက်နှင့်ဘောင်းဘီလေးဝတ်ထားခဲ့မိသည်။ အဲဒါကပဲ ကျွန်မအတွက် ကံကောင်းသွားခဲ့လေသည်။ ကျွန်မနာကျင်မသွားခဲ့ဘူးလို့တော့ထင်ပါသည်။ အဲဒီခွေးဟာ စနောက်ရုံလောက် ခပ်ဖွဖွဆကာ ကိုက်လိုက်တယ်ထင်ရဲ့။ ကျွန်မ အလန့်တကြား အသံထွက်အော်မိလေသလား မမှတ်မိပါ။ အိမ်ထဲကလူကြီးတွေထွက်လာပြီး ခွေးတွေကို အော်ဟစ်ငေါက်ငမ်းတော့မှ ခွေးတွေအိမ်ထဲပြေးဝင်သွားခဲ့သည်။ ကျွန်မ အရှက်သည်းပုံများ အသက်ငယ်ငယ် ကလေးအရွယ်မှာတောင်အဲဒီလူကြီးတွေက ပေါက်ပြဲသွားလား စစ်ဆေးကြည်ဖို့လက်မခံဘဲ အိမ်ကိုသာ ပြန်ပြေးခဲ့လေသည်။ အိမ်ရောက်တော့ ကံကောင်းစွာပဲ ကျွန်မတင်ပါးမှာ အနီရောင်သန်းရုံလေးကလွဲလို့ ပေါက်ပြဲရာတစ်ခုမှ ရှိမနေခဲ့ပါ။ အဲဒီအဖြစ်အပျက်ဟာလည်း ကျွန်မ အိပ်မက်ရုပ်ရှင်ထဲက အိမ်နဲ့အတူ တွဲလျှက်ပါလာတတ်တဲ့ ဇာတ်ဝင်ခန်းဖြစ်နေတတ်သည်။

          နောက်တစ်ခန်းဆိုရင် နွေရက်တွေထဲက ဇာတ်ဝင်ခန်းဖြစ်ပါလိမ့်မည်။ နွေမှာတော့ အိပ်ပေါ်ထပ် ကျွန်မတို့အိပ်ခန်းထဲဟာ သိပ်ပူတာပဲ။ အဲဒီအချိန်တွေဆို ကျွန်မတို့အခန်းထဲမအိပ်နိုင်ကြတော့ပါ။ မေမေက ကျွန်မတို့ကို ညမအိပ်ခင် ရေချိုးစေသည်။ နွေရာသီဆို ပူစပ်စပ်နဲ့ ကျွန်မတို့ကျောကုန်းလေးတွေမှာပေါ်လာတတ်တဲ့ ချွေးမိတ်ဖုလေးတွေကို တစစ်စစ်နဲ့ နေအောင်အယားပြေကုတ်ပေးမည်။ ပြီးရင် ကရမက်ကို ဆားနဲ့ကျောက်ပျဉ်မှာ သွေးပြီး ကျွန်မနဲ့ အစ်ကိုကို မေမေက လိမ်းပေးတတ်သည်။ ကရမက်နံ့သင်းသင်းလေးနဲ့ အေးအေးမွှေးမွှေးအရသာလေးကို သဘောကျလွန်းတော့ ကျွန်မတို့မှာ ကျောပြင်က ခပ်စူးစူး စပ်ရှားရှားအရသာကို ဂရုမထား အောင့်အည်းသည်းခံကြလေသည်။ ကရမက်သနပ်ခါးမခြောက်တစ်ခြောက် မျက်နှာမည်းမည်းတွေနဲ့ ကျွန်မတို့အချင်းချင်း အလှပြိုင်ကြသေးသည်။ ပြီးရင်တော့ ဘုရားစင်ရှေ့မှာ ထောင်ထားတဲ့ မိသားစုခြင်ထောင်ကြီးထဲ အလုအယက် တွန်းတိုက်ပြေးဝင်ကြသည်။ ဘယ်နှယောက်အိပ်ခြင်ထောင်လည်း ကျွန်မ မသိခဲ့ပါ။ ကျွန်မတို့ မောင်နှမတွေအားလုံး ဝင်သလောက်ဆံ့တဲ့ခြင်ထောင်ကြီးလို့ပဲ ကျွန်မ မှတ်မိနေခဲ့သည်။ အဲဒီခြင်ထောင်ကြီးထဲ တိုးဝှေ့ကာ ခင်းထားတဲ့ သင်ဖြူးဖျာချောချောလေးပေါ်မှာပဲ ကျွန်မတို့ စုပြုံအိပ်ကြတော့သည်။ အဲဒီအချိန်များ နွေလေရူးလေးတသုတ်လောက် တောင်မြောက် အရှေ့အနောက် အမျိုးမျိုးအသော့နှင်တိုက်ခတ်လိုက်ရင်တော့ ကျွန်မတို့ရဲ့ ခြင်ထောင်ကြီးဟာ ပိန်ကာ ဝကာ လူးကာလွင့်ကာပုံစံအမျိုးမျိုးပြောင်းလေတော့သည်။ ကျွန်မတို့ကတော့ ခြင်ထောင်ထဲမှာ အလကားနေရင်းနဲ့ကို တခိခိနဲ့ ရယ်မောပျော်ရွှင်နေကြသည်။ အဲဒီအချိန်ဟာလည်း ကျွန်မ အိပ်မက်ရုပ်ရှင်ထဲက ပြကွက်တစ်ကွက်ဖြစ်တတ်ခဲ့သည်။

       အဲဒီနွေညလယ်တွေကျွန်မတို့ အိပ်မပျော်နိုင်ခဲ့ရင် အစ်ကိုလတ်ပြောပြတဲ့ ဖိုးသူတော်ပုံပြင်(တကယ်တော့ ပုံပြင်မဟုတ် သူ့အတွေ့အကြုံအစစ်လို့ပြောဖူးသည်) ကို နားထောင်ရင်း ကျွန်မတို့ ကြောက်ချင်ဟန်ပြကာ အစ်ကိုလတ်ကို စိတ်ကျေနပ်စေခဲ့ကြသည်။ အစ်ကိုကပြောသည်။ သူတစ်ညမှာ သန်းခေါင်ယံကျော် နိုးလာခဲ့သတဲ့။ သူဘာရယ်မဟုတ် ကျွန်မတို့ အိမ် တောင်ဘက်က ဘုန်းကြီးကျောင်းဘက်ကို အကြည့်ရွေ့မိခဲ့သတဲ့။ အဲဒီမှာ ဘုန်းကြီးကျောင်းတံတိုင်းပေါ်မှာ အထက်အဖြူ အောက်အဖြူနဲ့ ဖိုးသူတော်ကို တွေ့ခဲ့ပါလေရောလို့ဆိုသည်။ ကျွန်မ အဲဒီအချိန်မှာ ညသန်းခေါင်ယံအချိန်၊ ဖြူဖြူဖွေးဖွေးအရိပ်ကြီး ဆိုတာနဲ့ ကျောထဲစိန့်ကနဲ ကြောက်သွားမိသလိုဖြစ်ခဲ့ပါသည်။ အစ်ကိုလတ် ဆက်ပြောတဲ့ “သူတို့ ဖန်ခုံတန်း ကစားနေကြတာသိလား” ဆိုတဲ့နေရာလည်းရောက်ရော ကျွန်မ ခစ်ကနဲ ရယ်ချမိတော့သည်။ အစ်ကိုကတော့ ကျွန်မကို မရယ်ဖို့ဘဲ တချက်ဟန့်တားပြီး သူ့ရဲ့ ဖိုးသူတော်ကိုအကြောက်ပိုအောင် “ငါ တကယ်တွေ့တာနော်” လို့ ထပ်ကာထပ်ကာ အတည်ပြုခဲ့သေးသည်။ ကျွန်မ အဲဒါကိုလည်း အိမ်နဲ့ အတူ ပြကွက်တစ်ကွက် အိမ်မက်ထဲဖန်တီးပြန်သည်။

           အိမ် ပြကွက်တွေထဲမှာ ကျွန်မနဲ့ အစ်ကို အကြိုက်ဆုံး မာကလာပင်တွေလည်းပါတတ်သေးသည်။ မာကလာပင်ပေါ်တက်၊ ကိုင်းပေါ်အကျအနထိုင်တာ လမ်းလက်မှီသမျှ စိမ်းစိမ်းမှည့်မှည့် ခူးစားတတ်တဲ့အဖြစ်အပျက်လေးကို ပြကွက်တစ်ကွက်အဖြစ် မြင်မက်တတ်သည်။ ပြောရရင် အဲဒီမာကလာပင်ဟာ သိပ်ပြီး မနိမ့်လှပါ။ ခပ်မတ်မတ် မြင့်နေတဲ့ အပင်မျိုးပါ။ ဒါပေမဲ့ ကျွန်မတို့ကတော့ အပင်ပေါ်တက်ဖို့ကျွမ်းကျင်လှပါသည်။ ကျောင်းပိတ်ရက်နေ့လည်တွေ မေမေ ကျွန်မတို့ကို တရေးတမော အိပ်ခိုင်းတဲ့အချိန်၊ မေမေ့ရှေ့မှာဟန်ဆောင်အိပ်နေကြပြီး၊ မေမေအလုပ်များနေပြီ၊ မေမေ မသိနိုင်တော့တဲ့အချိန်ဆို ခြေအသာဖွ၊ လစ်ထွက်လာကာ မာကလာပင်ပေါ်တက်ထိုင်နေတတ်ကြသည်။ အဲဒီနေ့လည်နေ့ခင်းမျိုးမှာ ကျွန်မ အစ်မငယ်နဲ့ အစ်ကိုကြီးကို စိတ်ဆိုးလှသည်။ အစ်ကိုကြီးနဲ့ အစ်မငယ်ဟာ ကျွန်မတို့ကလေးနှစ်ယောက် တကယ် အိပ်မအ်ိပ် စောင့်ကြည့်နေပြီး ကျွန်မတို့လှုပ်ရင် “မေမေရေ လှုပ်နေပြီ”၊ မျက်စိတလှုပ်လှုပ်နဲ့ မအိပ်နိုင်ဖြစ်နေကြရင်လည်း “နှစ်ကောင်သားမျက်စိလှုပ်နေပြန်ပါပြီ”၊ “စကားတတွတ်တွတ်ပြောနေပြန်ပြီ” ဆိုကာ အမျိုးစုံ သတင်းပို့ တိုင်တန်းကြလေသည်။ ကျွန်မတို့မှာ အားလုံးရဲ့ အလစ်မှာမှ အိမ်အောက်ကို ဆင်းပြေး မာကလာပင်ဆီပြေးရတာမျိုးပါ။ ကျွန်မတို့ထိုင်နေကျ မာကလာကိုင်းတစ်ကိုင်းဟာ ခြံစည်းကိုကျော်လို့ အိမ်အပြင်လမ်းမဘက်ကို ထိုးထွက်နေသေးသည်။ မာကလာကိုင်းပေါ်တက်ထိုင်ပြီး အောက်ကို ငုံ့ကြည့်လိုက်ရင် အောက်မှာ အိမ်ရှေ့က ရေမြောင်းနဲ့ တည့်တည့်ဖြစ်နေတော့သည်။ ဒါလည်း ကျွန်မတို့ ကြောက်ရလန့်ရမှန်းမသိခဲ့ပါ။ လမ်းမကနေ သူငယ်ချင်းတချို့ဖြတ်သွားလို့ ကျွန်မတို့ကို မာကလာပင်ပေါ်မှာဆိုတာတွေ့သွားခဲ့ရင် “ဟယ်” လို့ အာမေဋိတ်ပြုတတ်ကြသေးသည်။ တကယ်ဆို ကျွန်မနဲ့ အစ်ကိုဖြင့် သိပ်မငယ်လှတော့ပါ။ တော်တော်အသက်ကြီးတဲ့အထိ အဆော့သန်ကြဆဲ။ ရန်ဖြစ်သန်ကြဆဲ ကျွန်မတို့ပါ။ အဲဒီ မာကလာကိုင်းပေါ်ကနေ ရေမြောင်းကိုငုံ့ကြည့်တဲ့အခါမြင်ရတဲ့ မြင်ကွင်းကိုလည်း အိပ်မက်ရုပ်ရှင်မှာ ကျွန်မ ပြန်မြင်တတ်ခဲ့သည်။

         ကျွန်မ အိမ်အကြောင်းမက်ပြီလားဆိုရင် သရဲအခြောက်ကောင်းတဲ့ ကျွန်မတို့ရဲ့ အစ်မအကြီးဆုံးကပဲ အမြဲသရဲခြောက်တဲ့ပြကွက်မျိုးလည်းပါတတ်သည်။ သရဲခြောက်တယ်ဆိုတာကတော့ အစ်မကြီးက ဟိုက ဒီကနေ ဘွားကနဲပေါ်လာပြီး ကျွန်မတို့ကို ခြောက်လှန့်သည်။ ကျွန်မတို့က ပြေးကာလွှားကာနဲ့ လွှတ်အောင်ထွက်ပြေး၊ ဆော့ကစားကြတာပါ။ ကျွန်မတို့ သရဲခြောက်တမ်း ကစားဖြစ်တဲ့အချိန်က ညတွေပါ။ အထူးသဖြင့် မေမေတို့ အပြင်သွားကြတဲ့အချိန် ကျွန်မရယ်၊ အစ်မငယ်ရယ် တူလေးရယ်ပဲရှိနေချိန်ဆို လိုက်ပြီးခြောက်တတ်သည်။ အစ်မကြီးက ဆံပင်ကျောလည်လောက်အရှည် ဝဲကနဲဖြာကျနေတဲ့ဆံပင်သားမျိုးပိုင်ဆိုင်ထားသူပါ။ အဲဒီဆံပင်ရှည်ဖါးဖါးကို သိမ်းယူရှေ့ဘက်ကိုချပြီး တခါတရံ ခပ်ပြင်းပြင်းခြောက်လှန့်တတ်သေးသည်။ အဲဒီအချိန် တူလေးက ငါးနှစ်သားအရွယ်လောက်လေး၊ သူ့ကို အစ်မငယ်နဲ့ ကျွန်မ တလှည့်စီချီပြီး အိပ်ပေါ်တက် အိပ်အောက်ဆင်း ပြေးလွှားပုန်းခိုကာ ဆော့ကစားကြသည်။ တူလေးခမြာ ကြောက်လည်းကြောက်၊ ပျော်လည်းပျော် သွားစိ၊ ကျောကော့ပြီး တဟီးဟီး အော်ဟစ်ပျော်ရွှင်နေတတ်သည်။ ကျွန်မတို့ဆော့ကစားရတာ ပြေးရလွှားရတာ ဘယ်လောက်ပဲမောမော၊ တူလေးကတော့ မောတယ်မရှိ၊ "မေမေ သရဲခြောက်ဦး၊ ဆော့ဦးမယ်”ဆိုပြီး မရပ်မနားပူဆာတတ်သည်။ သူ့ရဲ့ မေမေ သရဲခြောက်တာကိုပဲ သဘောအကျကြီးကျနေတတ်ခဲ့သည်။တခါတရံ ကျွန်မတို့ တကယ်ကြောက်ပြီး အိမ်ထဲမဝင်ရဲဘဲ လမ်းမပေါ်ထွက်ထိုင်နေခဲ့ရသေးသည်။ အိမ်ထဲခြေလှမ်းလိုက်တာနဲ့ အစ်မကြီးက ဆံပင်ဖါးဖါး ရှေ့ချ၊ ဗြဲကနဲ ပေါ်ထွက်လာကာ အပြေးခြောက်တတ်ခဲ့သည်ကိုး။ တစ်ညမှာဆို ညည သူငယ်ချင်းတွေနဲ့ လဘက်ရည်ဆိုင်ထိုင် နောက်ကျမှအိမ်ပြန်လာတတ်တဲ့အစ်ကိုကြီးရဲ့ ခြင်ထောင်ထဲ အစ်မကြီး ဆံပင်ဖါးလျားချကာ ထိုင်စောင့်နေခဲ့သည်။ အပြင်ကပြန်ရောက်လာတဲ့ အစ်ကိုကြီးခမြာ ခြင်ထောင်လေးမကာ ခြေအလှမ်း၊ ဆံပင်ဖျားလျားနဲ့ အစ်မကြီးကို မြင်ပြီး ငယ်သံပါအောင် အော်ဟစ်ခဲ့ဖူးသည်။ ကျွန်မတို့မှာတော့ တခစ်ခစ်နဲ့ ရယ်မောမဆုံး၊ ပြန်ပြောမဆုံးဖြစ်ခဲ့ကြသေးသည်ပေါ့။

         ကျွန်မငယ်ငယ်လေး အဆိုတော်ဖြူသီ သီချင်းတွေခေတ်စားနေတဲ့အချိန် မေမေနဲ့ အစ်မတွေက ဖြူသီ သီချင်းခွေကို အကြိမ်ကြိမ်ရစ်ကာဖွင့်တတ်ကြသည်။ ကျွန်မမှာ သီချင်းစာအုပ်ကိုင်ဖတ်၊ သီချင်းအလွတ်ကျက်စရာမလိုပါဘဲနဲ့ သီချင်းတိုင်းအလွတ်ရနေခဲ့ပါသည်။ တစ်ခါ … လသာသာ ညတစ်ည ကျွန်မတို့ အိမ်ရှေ့မှာ ခုံတွေချ၊ လဘက်သုပ်၊ ရေနွေးကြမ်း စားစရာအမြည်းတွေနဲ့ ဝိုင်းဖွဲ့ထိုင်ကြသည်။ ကျွန်မက အစ်မကြီးပေါင်ပေါ်တက်ထိုင်နေခဲ့ပြီး အစ်မကြီးက “မမကို ဖြူသီသီချင်းတွေဆိုပြပါ”လို့ တောင်းဆိုလာခဲ့သည်။ ကျွန်မ အလွတ်ရနေတဲ့သီချင်းတွေမို့ တစ်ပုဒ်ပြီးတစ်ပုဒ်ဆက်တိုက် မမောမပမ်းနိုင်ဆိုပြလိုက်ပါသည်။ ကျွန်မ အကောင်းဆုံးကြိုးစားဆိုခဲ့သည်ထင်မိသည်။ ဒါပေမဲ့ သီချင်းတစ်ပုဒ်ပြီးတိုင်း မေမေ နဲ့ အစ်မတွေက ခိုးခိုးခစ်ခစ်ရယ်မောကြတာများ အတောမသတ်နိုင်အောင်ပင်၊ မေမေဆို မျက်ဝန်းထောင့်မျက်ရည်စလေး တို့ထိသုတ်ရသည်အထိ ရယ်မောခဲ့လေသည်။ ကျွန်မ စိတ်ထင်တော့ ကျွန်မ သီဆိုတာတော်တော်ကောင်းသည်လို့ပဲ ထင်ခဲ့မိသည်ကိုး။ အားလုံးက ဘာကြောင့်များရယ်မောကြလည်း အဲဒီအချိန်တုန်းက တကယ်နားမလည်နိုင်ခဲ့ပါ။ အခုတော့ ကျွန်မ နည်းနည်းသဘောပေါက်လာခဲ့ပြီထင်ရဲ့။ ကလေးပိစိကွေးလေးက လူကြီးသီချင်းကို ကျကျနန စိတ်ပါလက်ပါဆိုနေတာကိုများ ရယ်မောခဲ့ကြသလား။ ကျွန်မ သီချင်းဆိုရင် နှာသံကလေးနဲ့ ဆိုသည်တဲ့။ အစ်မကြီးပြောတာ ကြားမိခဲ့သည်။ ကျွန်မ မှတ်မိသေးသည် သီချင်းတစ်ပုဒ်မှာဆို “မောင်ရေ သွားမယ်ဘာလုပ်နေလဲ xxx တော်ကြာနောက်ကျနေမယ် xxx နိုင်ငံခြားသွားမယ့်မောင့်ရဲ့သူငယ်ချင်းလိုက်ပို့မယ် xxx မောင်ကလည်းဟယ် xxx အငှားကား ရဖို့ရာမလွယ် xxx သူများလို xxx ကိုယ်ပိုင်ကားနဲ့ မသွားနိုင်သေးတဲ့ဘဝမို့ပေါ့ကွယ် xxx”  စာသားလေးက အဲဒီလို၊ ကလေးပိစိကွေးက နှာသံပါပါ၊ ဒီစာသားနဲ့ စိတ်ပါလက်ပါဆိုနေဟန်က စနောက်ချင်စရာ၊ ရယ်ပွဲဖွဲ့ချင်စရာဖြစ်နေခဲ့မှာပေါ့။ ကျွန်မဆိုလည်း ရယ်မောမိမှာပါပဲ။ အဲဒီသီချင်းဆိုပြခဲ့တဲ့အရွယ်လေး၊ ကျွန်မ အစ်မကြီးပေါ် အကျအနထိုင်လို့ သီချင်းတွေဆိုနေတဲ့ပြကွက်ဟာလည်း ကျွန်မရဲ့ အိမ်မက်မှာ ပြန်မြင်တတ်သေးသည်။

         တစ်နေ့ကဆို ကျွန်မ အိပ်မက်မက်ပုံများ၊ ကျွန်မက အိမ်ရှေ့အုတ်ခုံလေးမှာထိုင်ငေးနေရင်း ဖေဖေ့မှာရုံးကပေးတဲ့ Land Rover ကားရှိစဉ်က၊ ကားမောင်းတဲ့ဦးကိုထွေးကြီးဟာ စက်ရုပ်ကြီးတစ်ရုပ်လိုပဲ အိမ်ရဲ့တောင်ဘက်ကနေလမ်းလျှောက်လာသတဲ့။ ကျွန်မကိုမြင်တော့ ပြုံးပြုံရွှင်ရွှင် နှုတ်ဆက်လိုက်သေးသည်။ ဦးကိုထွေးပုံစံဟာ အရင်အတိုင်းပဲ ဘေးတိုက်ခပ်ပြားပြား စက်ရုပ်ပခုံးလို လေးထောင့်ကျကျရှိတဲ့ကိုယ်ခန္ဓာမျိုး၊ ကြီးမားလှတဲ့အရိုးအဆစ်တွေဟာ အသားပါးပါးလျားလျားကြားက ခပ်ငေါငေါထွက်နေတုန်းပဲ။ လမ်းလျှောက်ရင် အဲဒီအရိုးတွေဆီက “ဂျွတ် ဂျွတ် ဂေါက် ဂေါက်” ထွက်လာတတ်တဲ့ မြည်သံတောင် အိပ်မက်ထဲမှာ အမှတ်ထင်ထင်ရှိခဲ့သေးသည်။

         ကျွန်မတို့ငယ်ငယ်က ပထမအစမ်း၊ ဒုတိယအစမ်း၊ အတန်းတင် စာမေးပွဲသုံးခုမှာ ပထမအစမ်းပြီးတဲ့အချိန် အောက်တိုဘာကျောင်းပိတ်ရက် ၁၀ရက်ဟာ အိမ်မှာ လွတ်လပ်ပေါ့ပါးစွာပျော်ရွှင်ခဲ့ရတဲ့အချိန်တွေပေါ့။ နောက်ဆုံးနေ့ စာမေးပွဲပြီးလို့ အိမ်ကို ဒုန်းစိုင်းပြန်လာခဲ့ရင် အစ်မတွေက အိမ်ရှင်း၊ အိမ်အလှဆင်နေကြပြီ။ ပြတင်းတံခါးအခန်းဆီးစအသစ်တွေ လဲတပ်နေကြပြီ။ ပျဉ်းမနားသီတင်းကျွတ်ဆိုတာက ကျွန်မတို့ငယ်ငယ်တုံးက အစည်းကားဆုံးအချိန်တွေပါ။ ရန်ကုန်က နာမည်ကြီးအဆိုတော်မှန်သမျှ ဝတ်အသင်းအဖွဲ့တွေက ငှားကြလေသည်။ ကျွန်မတို့ဖေဖေက မြို့ဦးဓမ္မာရုံဝတ်အသင်းအဖွဲ့က မြသပိတ်ကိုင်တဲ့လူကြီးတစ်ဦးဖြစ်ခဲ့သည်။ ဖေဖေက ဓမ္မာရုံကလူကြီး၊ ပြီးတော့ အိမ်ကလည်းကျယ်သည်။ ဖေဖေ့သားသမီးတွေကလည်း အဆို အတီး ဝါသနာပါကြသူတွေဆိုတော့ ရန်ကုန်က လာမယ့်အဆိုတော်တွေထဲက မိန်းကလေးအဆိုတော်တွေ အိမ်မှာတည်းခိုဖို့ ဖေဖေက တာဝန်ယူချင်ခဲ့သည်။ ဖေဖေက ဧည့်သည်များများ၊ သားသမီးတွေများများ စုစုရုံးရုံးရှိနေတာကို အမြဲသဘောကျတတ်ခဲ့သူမဟုတ်လား။ ဖေဖေ တာဝန်ယူရတယ်ဆိုတာကလည်း တကယ်တော့ ဖေဖေက ဧည့်သည်တွေအိမ်မှာတည်းဖို့ ခေါင်းလေးတစ်ညိတ်နဲ့ ခွင့်ပြုပေးရုံပါ။ မေမေနဲ့ အစ်မတွေကသာ ချက်ပြုတ်ကျွေးမွေးကြရသည်။ မလာခင် အိမ်ကို ရှင်းလင်းကြရသည်။ ကျွန်မနဲ့ အစ်ကိုငယ်ကတော့ ဆော့ကစားဖို့ပဲ တာဝန်ယူကြလေသည်။ 

         ဆောင်းမနက်ခင်းတွေမှာဆိုရင် မနက်စောစော မြူခိုးတွေတဝေဝေ၊ ဘယ်လောက်ပဲအေးနေပါစေ။ မေမေကတော့ အမြဲပဲ အစောကြီးပဲ နိုးတတ်ပါသည်။ ကျွန်မတို့ကို စာသင်ပေးဖို့ အိမ်အထိအရောက်လာတတ်တဲ့ ကန်နားကျောင်းအုပ်ဆရာကြီး ဦးမြအောင်ဟာလည်း မေမေ့လိုပဲ အစောကြီးနိုးတတ်သူဖြစ်ခဲ့သည်။ ကျွန်မတို့ အိမ်ကို ဆရာကြီးရောက်တဲ့အချိန်ကပင် တော်တော်ကိုစောနေသေးသည်။ ကျွန်မတို့က အိပ်ရာထဲက တိုးမထွက်ချင်၊ ဆက်ပြီးအိပ်ချင်နေကြသေးသည်။ မေမေက ဆရာကြီးကို အင်မတန်ရိုသေခင်မင်လေးစားသည်။ အားနာလေသည်။ အဲဒီတော့ မေမေက ကျွန်မတို့ကိုပဲ ကျိတ်ပြီး မြန်မြန်အိပ်ရာထဖို့ နှိုးလေသည်။ တစ်ခါနှစ်ခါနှင့် ကျွန်မတို့မလှုပ်ကြရင် ကျွန်မတို့ ခြေဖဝါးတွေကို မေမေက ဂလိထိုးကာ နိုးပါတော့သည်။ ကျွန်မစိတ်ထင်တော့ ဂလိထိုးသည်ဆိုတာထက် ပိုပြင်းပြီး ကုတ်ဆွဲတာလို့ထင်ခဲ့သည်။ ယားကျိကျိထက်ပိုတဲ့အရသာမျိုးကိုး။ မေမေက ရေဒီယိုတစ်လုံးနှင့် မနက်ခင်းတွေကို စတင်လေ့ရှိသည်။ အိမ်တောင်ဘက် ခြံဝင်းထဲ ငယ်ငယ်တုန်းကတော့ စံပယ်ပင်တွေ အတန်းလိုက်စီတန်းချထားခဲ့သည်။ ဆရာကြီး စာသင်ချိန်ပြီး ပြန်သွားခဲ့ရင် စပယ်ပင်တန်းထဲမှာ စပယ်ပွင့်လေးတွေ ခူးနေတဲ့မေမေ့ကို ရှာတွေ့နိုင်ပါသည်။ ဖေဖေကတော့ ဆေးခန်းနဲ့ အိမ်ရှေ့လဘက်ရည်ဆိုင်၊ အိမ်ရှေ့က မနက်ခင်းဈေးတန်းလေးထဲမှာ ဝင်လိုက်ထွက်လိုက်နဲ့ ဈေးဝယ်လိုက်၊ လူနာတွေဆေးကုပေးလိုက်ရှိနေခဲ့သည်။ ဖေဖေ့ကိုရှာချင်သော လူနာတွေဟာ ဖေဖေ့အကြောင်းသိနေကြသူတွေမို့ပဲ ဖေဖေ့ကို ဆေးခန်းထဲမှာမတွေ့ရင် အိမ်ရှေ့က လဘက်ရည်ဆိုင်မှာ သွားရှာကြသည်။ လဘက်ရည်ဆိုင်ထဲမတွေ့ခဲ့ရင် ဈေးတန်းထဲ တစ်ပတ်လှည့်ကာ ရှာဖွေကြလေသည်။ အဲဒီအချိန်တုန်းက အိမ်ရှေ့လမ်းမမှာ မနက်ခင်းမှာပဲရောင်းချကြတဲ့ဟင်းသီးဟင်းရွက်ဈေးလေး ရှိခဲ့သေးသည်။ ဖေဖေက ငရုတ်သီးလေးဝယ်လာလိုက် မေမေ့ကိုပေးလိုက်၊ ပြန်ထွက်သွားလိုက်၊ နောက်ထပ် အသီးအရွက်တစ်ခုခုဝယ်လာလိုက် ပြန်ထွက်သွားလိုက် အမြဲသွက်လက်လှုပ်ရှားနေခဲ့သည်။ 

         အခုဆိုရင်အိမ်တောင်ဘက်က စံပယ်ရုံဖွေးဖွေးမှာ စပယ်ပွင့်ဖြူဖြူလေးတွေနဲ့ မေမေ့ကို ရှာမတွေ့နိုင်တော့ပါ။ စံပယ်ရုံဖွေးဖွေးမရှိတော့သလို ကျွန်မကလည်း အဲဒီနေရာမှာရှိမနေခဲ့တော့ပါ။ အခု မေမေ့ကို ကျွန်မရှာတွေ့ချင်ရင် Gtalk မီးစိမ်း၊ မီးနီ၊ မီးဝါ မှာ ရှာဖွေရတော့သည်။ အသံကြားချင်ရင် Viber ခရမ်းရောင်မှာ စကားပြောဖို့ ကြိုးစားရသည်။ မေမေ့ရဲ့ လှုပ်ရှားမှုလေးတွေ၊ မေမေ့ရဲ့ ဓာတ်ပုံလေးတွေကို Facebook ပြာပြာမှာ လိုက်လံကြည့်ရှုရသည်။ ဖေဖေကတော့ အင်မတန်ငြိမ်ဆိမ်သွားခဲ့လေပြီ။ ဖေဖေ့ကို မေမေ့လောက်တောင်မှ လွယ်လင့်တကူရှာမတွေ့နိုင်တော့ပါ။ ဖေဖေက စကားပြော အင်မတန်နည်းသွားခဲ့သည်တဲ့ မေမေက သတင်းစကားပါးသည်။ ဟိုး အရင်တုန်းကလို မရပ်မနားသွားလာမနေတော့ပေ။ လမ်းသိပ်မလျှောက်တော့ချေ၊ ဘုရားသွားဖူးကြရင် ဖေဖေဟာ ဘီးတပ်လှည်းနဲ့ သွားနေရပြီတဲ့။ ဖေဖေနဲ့ စကားပြောဖို့ဆိုရင် နားသိပ်မကြားတော့တဲ့ ဖေဖေက ဖုန်းပြောဖို့ကိုလည်း စိတ်မရှည်၊ စိတ်မပါလှတော့ချေ၊ ဖေဖေ့ကို ကျွန်မရှာတွေနိုင်မယ့်နေရာတွေ နည်းပါးသွားခဲ့ပြီ။ ကျွန်မက အဝေးမှာရောက်နေခဲ့သည်။

         ကျွန်မရဲ့မသိစိတ်ထဲက အိပ်မက်အိမ်မှာတော့ မေမေ့ကို စံပယ်ဖွေးဖွေးတွေနဲ့အတူ၊ ဇွန်ပွင့်မွှေးမွှေးလေးတွေနဲ့အတူ ခဏခဏရှာတွေ့သည်။ ဖေဖေ့ကိုတော့ ဆိုင်ကယ်စီးလို့၊ ဖေဖေ့အသိဈေးဆိုင်လေးတွေဆီ တစ်ဆိုင်ချင်းဝင်နှုတ်ဆက်လို့ ပြုံးရွှင်ရယ်မော စကားတွေဖောင်ဖွဲ့ပြောဆိုနေတာ မြင်တွေ့ရသည်။ ကျွန်မကတော့ အစ်မကြီးပေါင်ပေါ် တက်ထိုင်နေလျှက်က ဖြူသီရဲ့သီချင်းတွေ နှာသံလေးနဲ့ ဆိုပြနေပြန်သည်။

*********

         အိပ်မက်ထဲမှာတော့ ကျွန်မ အိမ်တစ်အိမ်မှာ အမြဲလိုရှိနေတတ်သည်။ အိပ်မက်ထဲက ပြကွင်းပြကွက်တွေဟာ  ငယ်ငယ်က ကျွန်မလှုပ်ရှားရှင်သန်ခဲ့ရာ ပုံရိပ်တွေဖြစ်နေတတ်သည်။ အိမ်မက်ထဲက အိမ်ဟာ ကျွန်မ မွေးဖွားခဲ့ရာ ပျဉ်းမနားကအိမ်ဖြစ်ပါသည်။ အိပ်မက်ရုပ်ရှင်ထဲက ရှုတင်အိမ်က အမြဲပဲ ပျဉ်းမနားအိမ်ဖြစ်နေသည်မှာ အံ့သြစရာကောင်းလွန်းမနေဘူးလား။ မသိစိတ်ရဲ့ စေရာ အိမ်အတွက် ဇာတ်ညွှန်းရေး၊ ဇာတ်ဝင်ခန်းတွေပြင်ဆင်တည်းဖြတ်၊ ကိုယ်တိုင်သရုပ်ဆောင်ရင်း ကျွန်မ အံ့အားသင့်နေခဲ့ပါသည်။          ။ 

ဖြိုးဖြိုး