လွတ်လပ်ပျော်ရွှင်ခြင်း ဘဝမှတ်တမ်းရေးရအောင်

လူတိုင်းမှာ ပြောပြစရာဘဝဇာတ်ကြောင်း ပုံပြင်တစ်ပုဒ်စီတော့ရှိနေကြမှာပါပဲ။ ဘာကြောင့်များ အဲဒီ ပုံပြင်တစ်ပုဒ်ကို စာလုံးလေးတွေအဖြစ် စီကာစဉ်ကာချရေးသင့်ပါသလဲ။ ဒီအချက်လေးတွေကို ဖတ်ကြည့်ရင် အခုပဲ စာတစ်ပုဒ်ရေးဖြစ်သွားတော့မှာပါ။

ကိုယ်ရေးကိုယ်တာအချက်အလက်တွေဟာ ချိတ်ဆက်မှုတွေကိုဖန်တီးတာပေါ့

သင့်ဘဝအကြောင်းကို ချရေးဖို့ အချိန်ယူလိုက်ပြီဆိုတာနဲ့၊ တခြားလူတွေကို သင့်အကြောင်းသိစေ၊ ခွင့်ပြုပေးလိုက်တာပါ။ အိမ်နီးချင်း၊ မိတ်ဆွေသူငယ်ချင်း နဲ့ မိသားစုဝင်တွေဟာ ကိုယ့်အကြောင်းဆိုတာ သင်နဲ့ထိတွေ့ဆက်ဆံဖူးတာလောက်ပဲ သိထားမှာပါ။ သူတို့မျှော်လင့်မထားတဲ့ သင့်အကြောင်း ရှုထောင့်မျိုးစုံက အမြင်အမျိုးမျိုးနဲ့ လေ့လာနိုင်တော့ သင်ဟာ ပိုပြီးစိတ်ဝင်စားစရာဖြစ်ရတယ်။

မိသားစုက ကျေးဇူးတင်ကြမယ်

သားသမီးတွေ၊ မြေးမြစ်၊ တူ/ တူမလေးတွေ အားလုံးဟာ သူတို့ ဒီနေ့သိကျွမ်းရင်းနှီးနေတဲ့သင် ဘယ်လိုဖြစ်တည်လာသလဲ သိခွင့်ပေးဖို့ ထိုက်တန်တဲ့သူတွေပါ။ ပိုပြီး အိုမင်းလာလေလေ တချိန်ကသင့်ကို ဘယ်လိုအခြေအနေတွေက ဒီလိုပုံဖော်ခဲ့သလဲဆိုတာ သူတို့ပိုပြီးစပ်စုချင်စိတ်ဖြစ်လာလေလေပဲတဲ့။ သင်ကျော်ဖြတ်နိုင်ခဲ့တဲ့ဘဝထဲက အတားအဆီးတွေကို ပြောပြတဲ့အခါ သူတို့အတွက် အကျိုးကျေးဇူးရနိုင်သေးတယ်။ အဲဒီအကျပ်အတည်း၊ အခက်အခဲတွေကို ဘယ်လိုနည်းဗျူဟာတွေအသုံးပြုပြီး အနိုင်ယူခဲ့တာလည်း သိခွင့်ရနိုင်တယ်။ အသိဥာဏ်ပညာတွေ လက်ကမ်းမျှဝေပါ။ သူတို့ရှာဖွေနေတဲ့ စံနမူနာယူထိုက်သူ သင် ဖြစ်သွားနိုင်ပါတယ်။

ရှေ့ဆက်ဖို့ အားယူနိုင်ဦးမယ်

ဘဝအတွေ့အကြုံတွေစီကာစဉ်ကာ စုစည်းကြည့်လိုက်တာဟာ တကယ်တော့ ပျောက်ကင်းသွားတဲ့ကုသမှုကို သေချာစေလိုက်တာပါပဲ။ ဆေးပညာဆိုင်ရာစမ်းသပ်စစ်ဆေးမှုတွေမှာ သက်သေပြခဲ့ကြတယ်။ အောက်မေ့ဖွယ်အမှတ်တရလေးတွေ၊ စိတ်ခံစားမှုလေးတွေ တစ်ခုချင်းစီကို စကားလုံးအဖြစ်ဖန်တီးခဲ့ရင် သင့်ရဲ့စိတ်ပိုင်းဆိုင်ရာကျန်းမာရေး ပိုလို့တိုးတက်သတဲ့။ အဖြစ်အပျက်ဟောင်းတွေကို ပြန်ပြီးစူးစမ်းမယ်။ ပြီးတော့ ရေးချမယ်။ အထူးသဖြင့် စိတ်အနှောင့်အယှက်ဖြစ်ခဲ့ရတဲ့အခြေအနေတွေကို ရေးပါ။ အဲဒါဟာ နေ့စဉ်စိတ်ဖိစီးမှုအဆင့်တွေကိုလည်း လျှော့ချပေးတယ်။ အိပ်ရေးဝဝအိပ်ပျော်နိုင်ဖို့လည်းကူညီပေးတယ်။ နှစ်နှစ်ခြိုက်ခြိုက်အိပ်မောကျဦးမယ်။ ပြီးတော့ စိတ်ခံစားမှုအပြည့်နဲ့ ကျန်းမာတဲ့ဘဝအနေအထားမှာ သာသာယာယာ၊ ကြည်နူးရွှင်မြူးနိုင်လိမ့်မယ်တဲ့။

ပိုပြီးတော့ ရှင်းရှင်းလင်းလင်းသိမြင်လာလိမ့်မယ်

ပြီးခဲ့တဲ့နှစ်တွေတုန်းက အဆိုးမြင်အတွေးတွေနဲ့ စိတ်ဗလာကျင်းနေခဲ့ပေမဲ့ သင့်ရဲ့ သိမြင်စွမ်းအား တိုးတက်လာလိမ့်မယ်။ အတွေးတွေဟာ မှုန်ဝါးထွေပြားမနေတော့ဘဲ ပြတ်သားလာတာကိုလည်း သတိပြုမိပါလိမ့်မယ်။ ပြီးခဲ့တဲ့ တရားမမျှတမှုတွေ၊ ပြဿနာတွေအကြောင်း တသသနောက်ကြောင်းပြန်တွေးနေတော့မှာမဟုတ်ဘူး။ စိတ်ထဲမှာ မှတ်မှတ်သားသားစွဲထင်နေတဲ့အရာတွေ မှေးမှိန်ပျောက်ကွယ်သွားလိမ့်မယ်။ ပြီးတော့ ကိုယ့်ရဲ့စိတ်ထဲဖြည့်တင်းရမယ့် စိတ်ဝင်စားဖွယ်ရာအသစ်အသစ်တွေ၊ သတင်းအချက်အလက်တွေအတွက် အခန်းသစ်ပေးနိုင်လာလိမ့်မယ်။ သင့်ဘဝအကြောင်းစာရေးခြင်းဟာ အသိဥာဏ်ပညာကို တက်ကြွလာစေပါတယ်။

ပိုပြီးနေသာထိုင်သာရှိလာမယ်

ပြင်းထန်တဲ့ခံစားချက်တွေနဲ့ လှို့ဝှက်အဖြစ်အပျက်လေးတွေကိုမထိခိုက်စေဘဲ ထုတ်ဖော်ရေးသားလိုက်တာဟာ သင့်ရဲ့ကျန်းမာရေးကိုလည်းတိုးတက်စေပါတယ်လို့ ဆေးပညာနဲ့ဆိုင်တဲ့သုတေသနတွေကဆိုတယ်။ အတိတ်ကို စူးစမ်းစစ်ဆေးတဲ့အခါသင့်ရဲ့ ကိုယ်ခံအားစနစ် အမှန်တကယ်ပိုပြီး သန်စွမ်းလာမယ်။ ပြီးတော့ သင့်ရဲ့မှတ်ဥာဏ်ထဲမှာ ရှာဖွေတွေ့လာတဲ့ အဖြစ်မှန်လေးတွေရေးချလိုက်ပါ။

လက်ရှိအချိန်ထဲ ပိုပြီးရပ်တည်မိလာမယ်

လေ့လာစမ်းသပ်မှုတွေအများကြီးမှာ ဖော်ပြထားကြတယ်။ လူတွေဟာ သူတို့ဘဝအကြောင်း ရေးသားကြတဲ့အခါ ဖြစ်နိုင်ဖွယ်ရှိတဲ့အသစ်တွေကိုလည်း ရှာဖွေနိုင်လာကြတယ်။ ပြီးခဲ့တဲ့နှစ်တွေကထိခိုက်နာကျင်မှုတွေရဲ့ အကြောင်း၊ အကျိုး အဲဒါလေးတွေကိုပြန်ပြီးဆင်ခြင်မိလာတယ်။ စိတ်/လူ ဖျားနာခဲ့တဲ့နေ့ရက်တွေ လျှော့ချနိုင်လာတယ်။ အလုပ်မှာ သင်တန်းတွေမှာ မှန်မှန်ရပ်တည်နိုင်လာပြီး grade တွေတောင် မြင့်တက်လာကြသတဲ့။ အဲဒါဟာ အသက်အရွယ်၊ ယဉ်ကျေးမှုတွေနဲ့ မဆိုင်လှပါဘူး။ အမျိုးသား/ အမျိုးသမီး အတူတူပါပဲ။ 

အတိတ်နဲ့လည်း ငြိမ်းချမ်းရေးရသွားဦးမယ်

စာရေးခြင်းဟာ တသသစွဲထင်နေခဲ့တဲ့ ခပ်ဝေးဝေးက ပြဿနာတွေထဲကနေ သင့်ကို တသီးတခြားဆီဖြစ်သွားစေတယ်။ ဒီနေ့အခြေအနေအတွက် အသုံးဝင်တဲ့အဖြေဟာထင်ရှားလာပြီး အတိတ်ဟာ အရေးမကြီးတော့တာ ပိုလို့ သိသာလာလိမ့်မယ်။ စဉ်းစားဆင်ခြင်မှု နဲ့ စာရေးခြင်းဟာ သင့်ရဲ့ အမြင်ကိုလည်း ပြောင်းလဲစေတယ်။

ဘယ်တော့မှ ပျင်းရိမှာ မဟုတ်တော့ဘူး

စာရေးခြင်းစီမံကိန်းဟာ သင့်ကို တစ်ခုခုလုပ်နေစေဖို့ အမြဲတမ်းပဲ ညွှန်ကြားစီစဉ်နေမှာပါ။ စာရေးခြင်းဟာ သင့်ဘဝရဲ့ ပုံမှန်လုပ်ငန်းစဉ်ဖြစ်လာမယ်။ ဒါမှမဟုတ် မိသားစုတွေ သူငယ်ချင်းတွေနဲ့လည်း ရင်းရင်းနှီးနှီးတွေ့ဆုံစကားပြောဖို့ တွန်းအားပေးလာပါလိမ့်မယ်။

အမွေအနှစ်တစ်ခုပေါ့

သင့်ရဲ့ ဘဝအကြောင်းစာရေးပြီးရင်တော့ ပျောက်ပျက်မသွားနိုင်တဲ့ စာအုပ်ပုံစံကိုယ်တွေမှတ်တမ်းလေးရှိလာပြီ။ အဲဒီမှတ်တမ်းလေးကို ကိုယ်ချစ်တဲ့သူတွေကို ပြသနိုင်တယ်။ စာအုပ်ထုတ်ဝေနိုင်တယ်။ အွန်လိုင်းမှာ/ စာအုပ်ဆိုင်တွေမှာ ရောင်းချနိုင်သေးတယ်။ ဘဝမှတ်တမ်းတိုင်းဟာ စိတ်ဝင်စားဖွယ်ကောင်းလှတာကိုး။ ဒါမှမဟုတ်ခဲ့ရင် ရိုးရိုးရှင်းရှင်းလေးပဲ သင့်ဘဝထဲက ပြီးစီးခဲ့တဲ့သတိပေးစာတမ်းလေးအဖြစ် သင့်လက်ထဲမှာ သိမ်းဆည်းထားနိုင်ပါတယ်။ သင့်ရဲ့မှတ်တမ်းလေးအပြီး အရေးအကြီးဆုံးတစ်ခု သင်ပိုင်ဆိုင်လိုက်တာကတော့ "လွတ်လပ်တဲ့ပျော်ရွှင်ခြင်း" ပါ။

Source : 10 Compelling Reasons Why You Should Write Your Life Story By Roberta Temes | Reader's Digest  

ဖြိုးဖြိုး(Living Fashion Magazine, August, 2014)